शिवसेना-राष्ट्रवादीकडून विश्वासघात, शिक्षेसाठी पक्ष फोडणं गरजेचं होतं, शेलारांचं स्पष्ट मत

विधानसभा निवडणुकीसाठी महायुती कोणते मुद्दे जनतेसमोर मांडणार?
निवडणुकीत महायुती विरुध्द महाविकास आघाडी अशीच थेट लढत होणार आहे. महायुती सरकारने गेल्या अडीच वर्षांत केलेली प्रगती आणि विकास आम्ही जनतेसमोर घेऊन जाणार आहोत. आम्ही केलेल्या कामावर आम्हाला जनतेने आमची निवड करावी, अशी आमची अपेक्षा आहे. ही निवडणूक मविआ काळातील स्थगितीचे सत्र विरुध्द महायुती सरकारची प्रगती अशीच राहणार आहे.

राज्यात दोन पक्ष फोडल्याचा आरोप सातत्याने भाजपवर केला जातो. त्याचा फटका बसेल, असे वाटते का?
२०१९मध्ये निवडणुकीच्या निकालानंतर शिवसेना आणि राष्ट्रवादी काँग्रेस यांनी विश्वासघाताचा खेळ केला. त्यांना शिक्षा देण्यासाठी हे पक्ष फोडण्यात आले आणि ते गरजेचे होते. या राज्यात काँग्रेस केवळ एका खासदारापुरती मर्यादित होती. ठाकरे यांनी त्यांना मदत करत थेट १८ वर नेले, पण स्वतःचे खासदार मात्र १९ वरून नऊवर आणले. भाजपला लोकसभेत अपेक्षित यश मिळाले नाही. परंतु, विश्वासघाताला दंडित करणे गरजेचे असते आणि ते आम्ही केले.

लोकसभेत भाजपची कामगिरी अपेक्षित झाली नव्हती. त्या पार्श्वभूमीवर विधानसभा निवडणुकीमध्ये त्यात काही सुधारणा होईल का?
नक्कीच. लोकसभा निवडणुकीत विरोधकांनी एक खोटे कथन पसरवून जनतेत संभ्रम पसरवला. भाजप या कथनाला उत्तर देण्यात कमी पडला. पण आता परिस्थिती बदलली आहे. मविआचे नेते आमच्या योजनांवर बोलण्यातच वेळ खर्च करत आहेत. त्यामुळे विधानसभेत निश्चितच वेगळा निकाल लागेल आणि पुन्हा महायुतीचे सरकार येईल. मुंबईमध्ये मविआ दोन आकडी संख्याही गाठू शकणार नाही.

भाजपकडून सातत्याने व्होट जिहादचा मुद्दा मांडला जात आहे. त्यावर तुमचे मत काय?
निवडणुकीत निवडून आल्यावर प्रत्येकाने सगळ्यांसाठी समान काम करावे, या मताचा मी आहे. काम केले तरी सगळेच काही आपल्याला मतदान करतात, असेही नाही. मात्र लोकसभेतील मतदानाचा पॅटर्न पाहिला तर सहा विधानसभांपैकी पाच विधानसभांमध्ये मताधिक्य असताना एका विधानसभेत काही समुदयांनी भीतीपोटी एकाच बाजूने एक गठ्ठा मतदान केल्यामुळे निर्णय वेगळा लागला. ही भीती त्यांच्या मनात विरोधकांनी निर्माण केली होती, हे लक्षात घ्यायला हवे.

अशाच पद्धतीचा एक गठ्ठा मतदानाचा पॅटर्न गुजराती समाजाचाही दिसतो…
हो. कारण त्यांनाही उद्धव ठाकरे कायम झोडपत राहातात. गुजरातवर कायम टीका करतात. त्यामुळे त्यांच्या मनातही भीती तयार होते. त्यातून एकगठ्ठा मतदान करण्याकडे कल दिसतो.

बटेंगे तो कटेंगे या प्रचाराच्या मुद्द्याबद्दल आक्षेप वाटत नाही का?
या विचारात काय आक्षेपार्ह आहे? बटेंगे तो कटेंगे हे एखाद्या धर्म समुदायाबद्दल नाही. देश एक राहिला नाही तर परकीयांकडून त्यावर आक्रमण होते. हिंदु, मुस्लिम, शीख अशा सर्वधर्मीय जनतेत जर फाटाफूट असेल तर शहरी नक्षलवादी डोके वर काढून आपल्याला दगा देतील. भाजप सातत्याने एक देश, एक निवडणूक, एक देश, एक रेशनकार्ड असा एकीचा विचार मांडत आहे. पण फुटीरतावादी त्याला विरोध करतात, हे लक्षात घ्यायला हवे.
Amit Thackeray : राज ठाकरेंमुळेच अमित ठाकरेंची वाट बिकट? सरवणकर तयार झालेले, शिवतीर्थावर निरोप पोहोचला, पण ‘त्या’ गोष्टीमुळे खोडा
धारावी पुनर्वसन प्रकल्पाला देवनारची जागा देण्यास भाजपची हरकत नाही. मग मुलुंडमध्ये विरोध का?
देवनारच्या डम्पिंग ग्राऊंडवरची जागा ही बांधकामात येईल, त्याचा फायदा जनतेला होईल. घरांचे बांधकाम झाले की त्याने परिसराचा चेहरामोहरा बदलून जाईल. मात्र मुलुंडमधील नागरिकांचा धारावी प्रकल्पग्रस्तांना सामावून घेण्यास सांस्कृतिक कारणांमुळे विरोध आहे. स्थानिकांची मागणी असल्याने आम्ही त्याला पाठिंबा देत आहोत. खारफुटीची जागा बांधकामाला देण्यावरून पर्यावरणवाद्यांचा विरोध आहे, पर्यावरण रक्षणाला आमचा विरोध नाही. पण घाटकोपरच्या डोंगरावरील वस्त्यांचे काय? तेथील पर्यावरण रक्षणाबाबत का बोलले जात नाही? विकासाला मानवी चेहरा असावा, अशी आमची भूमिका आहे. उद्धव ठाकरे यांनी धारावी पुनर्वसनाला विरोध करण्यापेक्षा त्याला पर्याय काय हे सांगावे.

अजित पवार यांच्या महायुतीतील सहभागाने फायदा झाला का?
नक्कीच फायदा झाला. भाजपविरोधी असलेल्या राष्ट्रवादी काँग्रेस दुभंगली आणि त्यातील एक गट आमच्यासोबत आला. त्यामुळे आमची ताकद नक्कीच वाढली आहे. मात्र ते आल्याने झालेला फायदा आमच्या कार्यकर्त्यांना समजावण्यात आम्ही नक्कीच कमी पडलो. ती मांडणी न केल्याने वेगवेगळी विधाने आणि नाराजी अधूनमधून व्यक्त होते. आगामी विधानसभा निवडणुकीत पवार यांचा महायुतीतील सहभाग पुन्हा अधोरेखित होईल.
Raj Thackeray : अमित ठाकरेंना कमी लेखण्याचा सरवणकरांचा प्रयत्न? राज ठाकरे ‘लढायचं तर लढा’ का म्हणाले? न झालेल्या भेटीचं धक्कादायक कारण
अमित ठाकरेंना पाठिंबा देण्यावरुन महायुतीत मतमतांतरे आहेत का?
माहीम मतदारसंघात मनसे अध्यक्ष राज ठाकरे यांचे सुपुत्र अमित ठाकरे प्रथमच निवडणुकीला उभे आहेत. विरोधक असले तरीही एक तरुण नेतृत्व राजकारणात येत आहे म्हणून त्याला पाठिंबा द्यावा, अशी भूमिका मी मांडली. एक अपवादात्मक परिस्थिती म्हणून अमित यांच्या पाठीशी उभे राहावे, अशी माझी मागणी आहे. परंतु, त्यांच्या विरोधात शिवसेनेचा उमेदवार रिंगणात आहे. त्यावर आमचे नेते देवेंद्र फडणवीस यांनी महायुती म्हणून लवकरच निर्णय घेऊ, असे सांगितले आहे. त्यामुळे तोपर्यंत या विषयावर बोलणे उचित राहणार नाही.

नवाब मलिक महायुतीचे उमेदवार असून त्यांना पाठिंबा का नाही?
आमचा मलिकांना विरोध त्यांच्या ‘मलिक’ असण्यावरून नाही तर त्यांच्यावर दाखल असलेल्या गंभीर गुन्ह्यामुळे आहे. राष्ट्रवादीने त्यांना उमेदवारी द्यावी की नाही, हा त्यांचा अधिकार आहे. परंतु, भाजप अशा उमेदवाराचा प्रचार करणार नाही, अशी स्पष्ट भूमिका आम्ही घेतली आहे. अणुशक्तीनगर मतदारसंघातून त्यांची मुलगी निवडणूक लढवत आहे, त्यांना आमचा विरोध नाही, कारण त्यांच्यावर कुठलाही गुन्हा नाही.