वर्षाच्या शेवटच्या रविवारीही पुष्पा 2चा डंका; २५ व्या दिवशी केली १६ कोटींची बंपर कमाई

रश्मिका मंदान्ना आणि अल्लू अर्जुन यांचा ‘पुष्पा 2’ हा चित्रपट केवळ या वर्षातील सर्वात मोठा चित्रपट नाही तर भारतातील सर्वात मोठा चित्रपट ठरला आहे. तीन आकड्यांनंतरही या चित्रपटाची कमाई दोन आकड्यांमध्येच आहे. मात्र, शुक्रवारी प्रथमच कलेक्शन सिंगल डिजिटवर पोहोचलं. मात्र दुसऱ्या दिवशी शनिवारी पुन्हा सिनेमाची कमाई पूर्वपदावर आली.

रविवारी ‘पुष्पा 2’ ने १६ कोटींची बंपर कमाई केली

Sacnilk च्या रिपोर्टनुसार, चित्रपटाने शनिवारी १२ कोटी ५ लाख रुपयांची कमाई केली होती, तर रविवारी १६ कोटी रुपयांची बंपर कमाई केलीये. या चित्रपटाने हिंदीत जवळपास १२ कोटी ७५ लाख रुपयांची कमाई केली आहे. एकूणच, चित्रपटाने केवळ देशांतर्गत बॉक्स ऑफिसवर ११५७ कोटी ३५ लाखांची कमाई केली आहे. सिनेमाच्या फक्त हिंदी भाषेच्या कमाईबद्दल सांगायचं तर या सिनेमाने ७५३ कोटी ९ लाख रुपये कमावले आहेत.

‘पुष्पा २’च्या जगभरातील कलेक्शनचा विचार केला तर या चित्रपटाने जवळपास १६३७ कोटींची कमाई केली आहे. या चित्रपटाने २४ दिवसांत जगभरात १६१८ कोटींची कमाई केली होती. तर परदेशात या चित्रपटाने जवळपास २६० कोटींची कमाई केली आहे. त्याचबरोबर इंडिया ग्रॉस कलेक्शनबद्दल सांगायचं तर ‘पुष्पा 2’ने १३८० कोटी रुपयांची कमाई केली आहे. ‘दंगल’ नंतर हा चित्रपट ‘बाहुबली 2’ च्या अगदी जवळ आला आहे आणि जगभरात सर्वाधिक कमाई करणारा चित्रपट आहे. मात्र, ‘बाहुबली 2’ला मागे टाकण्यासाठी ‘पुष्पा 2’ला १५० कोटींपेक्षा जास्त कमाई करावी लागणार आहे.