होळी साजरी केव्हा करायची ? १३ की १४ मार्चला | Maharashtra Times |

होळी आपल्याकडे दोन दिवस साजरी केली जाते एक असते छोटी होळी ज्यामध्ये होलिका दहन केले जाते. पूजा विधीने होळी पेटवून पुरणपोळीचा नैवैद्य होळीला दाखवला जातो. लहान मुले यावेळी डफली वाजवून आनंद लुटतात तर होळी हा एकमेव असा सण आहे ज्यादिवशी तुम्ही एकमेकांच्या नावाने बोंबा मारू शकता आणि समोरचा व्यक्ती तुम्हाला काहीच बोलत नाही कारण हीच तर होळीच्या सणाची आपली परंपरा आहे.

होलिका दहनाच्या दुसऱ्या दिवशी लोकं राखेची आणि रंगांची होळी खेळतात. ही मुख्य होळी असते. यादिवशी सकाळी लवकर उठून आदल्या दिवशीच्या होळीची जी राख असते ती एकमेकांच्या अंगाला लावून होळी खेळली जाते. तसेच रंगीबेरंगी कलर लावून होळीचा मनमुराद आनंद यावेळी सर्वजण लुटतात. असे दोन दिवस होळीचा सण साजरा केला जातो.

यंदा २०२५ मध्ये पंचांग नुसार, गुरुवार १३ मार्च २०२५ रोजी सकाळी १०:३५ वाजता पौर्णिमा सुरु होते त्यादिवशी रात्री होलिका दहन केली जाईल. होळी पेटवून तिची पूजा १३ मार्चला होईल. तसेच शुक्रवार १४ मार्च रोजी दुपारी १२:२३ वाजता पौर्णिमा तिथी संपते त्यादिवशी रंगांची होळी खेळली जाईल.

होळीतील रंगांची उधळण म्हंटले की डोळ्यासमोर येतात राधा कृष्ण. आपण पौराणिक कथांमध्ये राधा कृष्ण गोपीकांसोबत रंगांची होळी कसे खेळायचे हे ऐकलेय. त्यामुळे मथुरा, वृंदावन आणि बरसाना येथे होळी थंडाई पिऊन रंगांच्या पिचकाऱ्या मारत मोठ्या प्रमाणात आणि जल्लोषात साजरी केली जाते. तिथे जाऊन होळी खेळण्यासाठी लोक दुरुन येतात. त्याचप्रमाणे भारतभर होळी मोठ्या उत्साहात साजरी केली जाते.