Tej Police Times
कोल्हापूर परिक्षेत्रीय पोलीस कर्तव्य मेळाव्यात पुणे ग्रामीण पोलिसांचा डंका; ५७ पदकांसह जनरल चॅम्पियनशिपवर मोहोर
Tej पोलीस टाइम्स : परवेज शेख // कोल्हापूर परिक्षेत्रीय पोलीस कर्तव्य मेळावा २०२६ मध्ये पुणे ग्रामीण पोलीस दलाने दमदार कामगिरी करत जनरल चॅम्पियनशिप पटकावली आहे. विविध स्पर्धांमध्ये पुणे ग्रामीण पोलिसांनी तब्बल ५७ पदकांची कमाई केली आहे. कोल्हापूर येथे ३ ते ५ ऑगस्टदरम्यान २१ वा कोल्हापूर परिक्षेत्रीय पोलीस कर्तव्य मेळावा पार पडला. या मेळाव्यात पुणे ग्रामीणसह सातारा, सांगली, सोलापूर ग्रामीण आणि कोल्हापूर पोलीस दलातील अधिकारी व अंमलदार सहभागी झाले होते. सायंटिफिक एड्स टू इन्व्हेस्टिगेशन, पोलीस फोटोग्राफी, व्हिडिओग्राफी, अँटी-सॅबोटाज चेक, कॉम्प्युटर अवेअरनेस आणि डॉग स्क्वाड अशा विविध स्पर्धांमध्ये पुणे ग्रामीणच्या अधिकारी आणि अंमलदारांनी उल्लेखनीय कामगिरी केली. पुणे ग्रामीण पोलीस दलाने ४० सुवर्ण, ९ रौप्य आणि ८ कांस्य अशी एकूण ५७ पदके मिळवत स्पर्धेत प्रथम क्रमांक पटकावला आणि जनरल चॅम्पियनशिप आपल्या नावावर केली. या यशामध्ये पोलीस निरीक्षक विनय बहिर, सहायक पोलीस निरीक्षक प्रफुल्ल कदम, सहायक पोलीस निरीक्षक नितीन शिंदे, पोलीस उपनिरीक्षक महेश गायकवाड, तसेच पोलीस अंमलदार आणि इतर स्पर्धकांचे विशेष योगदान राहिले. हे उल्लेखनीय यश पोलीस अधीक्षक श्री. संदीप सिंह गिल्ल, अपर पोलीस अधीक्षक डॉ. शुभम कुमार आणि अपर पोलीस अधीक्षक श्री. गणेश बिरादार यांच्या मार्गदर्शनाखाली मिळाले. पुणे ग्रामीण पोलिसांच्या या शानदार कामगिरीबद्दल पदक विजेत्या अधिकारी आणि अंमलदारांचे कौतुक व अभिनंदन करण्यात आले आहे.
