पुण्यातील शिवाजीनगर पोलिसांनी अवघ्या दोन तासांत मोबाईल स्नॅचिंग करणाऱ्या सराईत चोरट्याला जेरबंद

तेज पोलीस टाइम्स : परवेज शेख पुण्यातील शिवाजीनगर पोलिसांनी अवघ्या दोन तासांत मोबाईल स्नॅचिंग करणाऱ्या सराईत चोरट्याला जेरबंद करत उल्लेखनीय कामगिरी केली आहे. १० जुलै रोजी सकाळी साडेसहाच्या सुमारास संचेती चौक परिसरात एका नागरिकाचा अंदाजे १ लाख ३७ हजार रुपये किमतीचा आयफोन १७ प्रो दुचाकीस्वाराने जबरदस्तीने हिसकावून पळ काढला होता. याप्रकरणी शिवाजीनगर पोलीस ठाण्यात गुन्हा दाखल करण्यात आला. घटनास्थळावरील सीसीटीव्ही फुटेज आणि गुप्त माहितीच्या आधारे पोलिसांनी सापळा रचून आकाश सुरेश वाघीरे, वय २१, रा. शिवाजीनगर याला वेताळबाबा टेकडी परिसरातून ताब्यात घेतले. आरोपीकडून चोरीस गेलेला आयफोन १७ प्रो तसेच गुन्ह्यात वापरलेली आणि चतुःश्रृंगी पोलीस ठाण्याच्या हद्दीतून चोरीस गेलेली सुझुकी अॅक्सेस दुचाकी जप्त करण्यात आली. एकूण सुमारे २ लाख ३७ हजार रुपयांचा मुद्देमाल पोलिसांनी हस्तगत केला आहे. आरोपीवर यापूर्वीही विश्रामबाग, भारती विद्यापीठ आणि चतुःश्रृंगी पोलीस ठाण्यात चोरीचे गुन्हे दाखल असल्याचे तपासात समोर आले आहे. ही धडाकेबाज कारवाई वरिष्ठ अधिकाऱ्यांच्या मार्गदर्शनाखाली वरिष्ठ पोलीस निरीक्षक गिरीशकुमार दिघावकर यांच्या नेतृत्वाखाली सहाय्यक पोलीस निरीक्षक संतोष पाटील आणि तपास पथकाने यशस्वीरित्या पार पाडली.