
Tej Police Times
पुणे – परवेज़ शेख
पुणे रेल्वे स्थानकात ‘स्थानक महोत्सव’ उत्साहात साजरा; गौरवशाली इतिहास आणि वारशाचे दर्शन
मध्य रेल्वेच्या पुणे विभागातर्फे १८ नोव्हेंबर २०२६ रोजी पुणे रेल्वे स्थानकावर ‘स्थानक महोत्सव’ मोठ्या उत्साहात साजरा करण्यात आला. या महोत्सवाच्या माध्यमातून स्थानकाचा समृद्ध इतिहास, ऐतिहासिक वारसा आणि गौरवशाली परंपरेचे स्मरण करण्यात आले. रेल्वे मंत्रालयाच्या उपक्रमांतर्गत ऐतिहासिक रेल्वे स्थानकांच्या स्थापनेच्या वर्धापनदिनानिमित्त हा महोत्सव आयोजित करण्यात येत आहे. १८५६ मध्ये स्थापन झालेले पुणे रेल्वे स्थानक हे या विशेष उपक्रमासाठी निवडण्यात आलेल्या ऐतिहासिक स्थानकांपैकी एक आहे.
या कार्यक्रमाला पुणे विभागाचे विभागीय रेल्वे व्यवस्थापक (DRM) श्री. राजेश कुमार वर्मा आणि अतिरिक्त विभागीय रेल्वे व्यवस्थापक (ADRM) श्री. पी. यू. जाधव यांची प्रमुख उपस्थिती होती. तसेच वरिष्ठ रेल्वे अधिकारी, कर्मचारी, शालेय विद्यार्थी आणि प्रवासी मोठ्या संख्येने उपस्थित होते.
उपस्थितांना संबोधित करताना श्री. राजेश कुमार वर्मा यांनी पुणे रेल्वे स्थानकाचे ऐतिहासिक महत्त्व अधोरेखित केले. रेल्वे संपर्काच्या विस्तारात आणि पुणे परिसराच्या विकासात या स्थानकाने बजावलेल्या महत्त्वपूर्ण भूमिकेचा त्यांनी उल्लेख केला. रेल्वेचा ऐतिहासिक वारसा जतन करण्याचे तसेच भारतीय रेल्वेचा समृद्ध इतिहास आणि परंपरा नव्या पिढीपर्यंत पोहोचविण्याचे महत्त्वही त्यांनी विशद केले.
या महोत्सवाचे प्रमुख आकर्षण म्हणजे पुणे रेल्वे स्थानकावर उभारण्यात आलेल्या स्वतंत्र ऐतिहासिक छायाचित्र दालनाचे उद्घाटन. या दालनात स्थानकाच्या आजवरच्या प्रवासातील ऐतिहासिक छायाचित्रे, संग्रहित दुर्मिळ छायाचित्रे, जुन्या रेल्वेची छायाचित्रे आणि महत्त्वपूर्ण टप्प्यांची माहिती प्रदर्शित करण्यात आली आहे. या दालनामुळे प्रवासी आणि पर्यटकांना पुणे रेल्वे स्थानकाचा ऐतिहासिक प्रवास जाणून घेण्याची तसेच या स्थानकाने परिसराच्या विकासात दिलेल्या योगदानाची माहिती घेण्याची संधी उपलब्ध झाली आहे.
याप्रसंगी “पुणे जंक्शन: गौरवशाली इतिहास एवं विरासत” या माहिती पुस्तिकेचेही औपचारिक प्रकाशन करण्यात आले. या पुस्तिकेत पुणे रेल्वे स्थानकाचे ऐतिहासिक महत्त्व, कालानुरूप झालेला विकास आणि त्याचा वारसा यांचे दस्तऐवजीकरण करण्यात आले असून, भावी पिढ्यांसाठी ही पुस्तिका उपयुक्त ठरणार आहे.
महोत्सवाचा एक भाग म्हणून दोन शाळांमधील विद्यार्थ्यांनी रेल्वेचा ऐतिहासिक वारसा आणि पुणे रेल्वे स्थानकाचा इतिहास या विषयांवर आधारित निबंध लेखन व चित्रकला स्पर्धांमध्ये उत्स्फूर्त सहभाग घेतला. विद्यार्थ्यांच्या सर्जनशीलतेला आणि सहभागाला प्रोत्साहन देण्यासाठी विजेत्यांना पारितोषिके देऊन गौरविण्यात आले.
भारतीय रेल्वेचे महत्त्व, तिचा ऐतिहासिक वारसा आणि समाजाच्या विकासातील योगदान याबाबत जनजागृती करण्यासाठी विशेष पथनाट्यही सादर करण्यात आले. सांस्कृतिक कार्यक्रम आणि इतर उपक्रमांमुळे महोत्सवात उत्साहपूर्ण वातावरण निर्माण झाले आणि प्रवासी तसेच उपस्थितांचे लक्ष वेधले गेले.
या स्थानक महोत्सवात रेल्वे अधिकारी, कर्मचारी, शालेय विद्यार्थी, प्रवासी आणि नागरिकांनी उत्साहाने सहभाग घेतला. भारतीय रेल्वेचा समृद्ध ऐतिहासिक वारसा जतन करणे, नव्या पिढीमध्ये ऐतिहासिक वारशाबाबत जागरूकता निर्माण करणे आणि रेल्वे व समाज यांच्यातील नाते अधिक दृढ करणे याप्रती पुणे विभागाची बांधिलकी या महोत्सवातून अधोरेखित झाली.
अशा उपक्रमांच्या माध्यमातून पुणे विभाग भारतीय रेल्वेच्या गौरवशाली वारशाचा सन्मान करण्यासोबतच भावी पिढ्यांना भारतीय रेल्वेचे ऐतिहासिक आणि सांस्कृतिक महत्त्व जाणून घेण्यासाठी प्रेरित करत आहे.
हे प्रसिद्धी पत्रक जनसंपर्क विभाग, पुणे विभाग, मध्य रेल्वे यांच्यातर्फे जारी करण्यात आले आहे.
Recover your password.
A password will be e-mailed to you.