फॉर्च्युनर कार ५० फूट खोल कालव्यात कोसळली; प्रसिद्ध लावणी कलावंत मीना देशमुख जागीच ठार

सोलापूर : मोडलिंबकडून पंढरपूरकडे जात असताना एक फॉर्च्युनर कार ५० फूट खोल कालव्यात कोसळल्याची घटना काल रात्री घडली आहे. या दुर्घटनेत जेष्ठ लावणी कलावंत मीना देशमुख या जागीच ठार झाल्या असून त्यांची कन्या, नात आणि चालक गंभीर जखमी झाले आहेत. अपघाताची माहिती मिळताच नागरिकांनी रात्री तातडीने रुग्णवाहिका बोलावली. सदर कालव्यात उतरायला जागा नसल्याने दोराच्या साहाय्याने जखमींना बाहेर काढून उपचारासाठी पंढरपूर उपजिल्हा रुग्णालयात पाठवले आले. मात्र सदर अपघातात मीना देशमुख यांचा जागीच मृत्यू झाल्याचे समोर आले.

रविवारी रात्री मोडलिंब-पंढरपूर रस्त्यावरील अरुंद पुलावरून गाडी जात असताना चालकाचे नियंत्रण सुटल्याने फॉर्च्युनर कार खोल कालव्यात पडल्याचं सांगितलं जात आहे. या अपघातात तीन जण जखमी झाले असून सध्या त्यांच्यावर रुग्णालयात उपचार सुरू आहेत. अंबिका अण्णा देशमुख वय वर्ष (३), जान्हवी अण्णा देशमुख वय (वर्ष १०), अण्णा देशमुख वय (वर्ष ३५) अशी अपघातातील जखमींची नावे आहेत.

कामावरून घरी परतला, जमिनीवर आडवा झाला; तितक्यात छातीवर पडला विषारी नाग अन् मग…

शर्थीने प्रयत्न करून तिघांना वाचवले

अपघात झाल्याचं लक्षात येताच पंढरपूरकडे जाणाऱ्या प्रवाशांनी १०८ क्रमांकावरून रुग्णवाहिका बोलावून घेतली. कालव्याची खोली जास्त असल्यामुळे रुग्णवाहिकेमधील कर्मचाऱ्यांना खाली उतरता येत नव्हते. त्यामुळे दोरीच्या साहाय्याने कालव्यात उतरत सर्वांनी मिळून मृत व जखमींना बाहेर काढले. शेटफळ येथील रुग्णवाहिका क्रमांक १०९६ मधील डॉक्टर शुभम भोसले व चालक चव्हाण तसेच पंढरपूर विठ्ठल मंदिर येथील रुग्णवाहिकेचे डॉक्टर सचिन भोसले व सचिन अहिरे आणि सोलापूर जिल्हा समन्वयक अनिल काळे अशा चार ते पाच जणांच्या टीमने जखमींना वेळेत उपचार मिळावेत, यासाठी प्रयत्नांची पराकाष्ठा केली.

बड्या अधिकाऱ्याच्या पत्नीने हॉटेलमध्ये संपवलं आयुष्य; मुलाच्या लग्नाचा बस्ता खरेदीसाठी गेल्यानंतर टोकाचं पाऊल

दरम्यान, पंढरपूर कुर्डुवाडी रस्त्याच्या चौपदरीकरणाचे काम जवळपास पूर्ण होत आलं आहे. मात्र पाटबंधारे विभागाच्या भोंगळ कारभारामुळे या पुलाबाबत अद्याप निर्णय झालेला नाही. त्यामुळे हा पूल सध्या प्रवाशांसाठी मृत्यूचा सापळा बनत चालल्याचा आक्षेप स्थानिकांकडून नोंदवला जात आहे.