नेहा फोन उचलेना, मावशीने जावयाच्या भावाला पाठवलं, दार उघडताच दिसलं भयानक दृश्य

दोन वर्षांपूर्वी त्यांचा विवाह झाला होता. आर्थिक कारणातून दोघांनी आत्महत्येसारखं टोकाचं पाऊल उचलल्याचा इंदिरानगर पोलिसांच्या प्राथमिक तपासात समोर आलं आहे. त्र्यंबकेश्वर येथे एका लॉजमध्ये प्रेमी युगलाने आत्महत्या केल्याची घटना ताजी असतानाच जिल्ह्यात आणखी एक दुहेरी आत्महत्येची घटना समोर आली आहे.

आर्थिक चणचण आणि पैसे मागणाऱ्यांचा तगादा यामुळे नैराश्यात गेलेल्या जगताप दाम्पत्याने पाथर्डी फाटा परिसरातील फ्लॅटमध्ये गळफास घेतला. सोमवारी उघड झालेल्या या घटनेमुळे शहरात खळबळ उडाली आहे. या प्रकरणी घटनास्थळी पोलिसांना मिळालेल्या ‘सुसाइड नोट’मध्ये घेणेकऱ्यांची नावे आहेत.

या प्रमुख दोन घेणेकऱ्यांसह इतरांवर आत्महत्येस प्रवृत्त केल्याचा गुन्हा इंदिरानगर पोलिसांत दाखल करण्यात आला आहे. परंतु, घेणेकऱ्यांबाबत अपूर्ण माहिती असून, दाम्पत्याच्या बँक व्यवहारांची पडताळणी पोलिस करीत आहेत.

रविवारी काय घडलं?

रविवारी नेहाची मावशी तिला फोन करत होती, मात्र पलिकडून कुठलाच प्रतिसाद मिळत नसल्याने ती चिंतेत पडली, अखेर तिने गौरवचा भाऊ यश जगताप याला फोन केला आणि गौरव-नेहा फोन उचलत नसल्याचं सांगितलं. सिडकोत राहणाऱ्या यशने त्यांचं घर गाठलं.

हेही वाचा : बाईकवर बाळाला दूध पाजणं जीवावर, खाली पडून महिलेचा मृत्यू, चिमुकली मातृत्वाला मुकली

घराचा दरवाजा आतून बंद होता. बराच वेळ कोणीही दार न उघडल्याने यशने काकांच्या मदतीने दरवाजा तोडला. हॉलमधील सिलिंग हुकाला सुताच्या दोरीने दोघंही गळफास घेतलेल्या अवस्थेत आढळले. या प्रकरणी अधिक तपास पोलीस करत आहेत.

हेही वाचा : मी कुत्र्यांच्या भांडणात पडत नाही; पुण्यात श्वान मालकच भिडले, पट्ट्यांनी हाणामारी