Tej Police Times
ताडदेवच्या ट्विन टॉवरमध्ये घुसले दोन रशियन युट्यूबर, ५८व्या मजल्यावरुन जीवघेणा स्टंट करणार इतक्यात…
मास्किम शचरबाकोव आणि रोमन प्रोशिन अशी या दोन रशियन युट्यूबर्सची नावे आहेत. सोमवारी २६ डिसेंबर रोजी हे दोघंही इम्पिरीअल ट्विन टॉवर कॉम्पेक्ल्समध्ये घुसले होते. दक्षिण मुंबईतील उच्चभ्रु परिसरांपैकी एक असलेली ही ६० मजली इमारत आहे. या दोघांनाही या इमारतीवरुन स्टंट करायचा होता. त्यासाठी दोघंही रात्रीच्या वेळेस इमारतीत घुसले. मात्र ही बाब वेळीच सुरक्षारक्षकांच्या लक्षात आली.
सीसीटीव्ही कंट्रोल रूममधील सुरक्षारक्षकाने दोन्ही युट्युबर्सना वरच्या मजल्यावर जाताना पाहिलं. त्यानंतर सुरक्षारक्षकाने त्यांना रोखण्याचा प्रयत्न केला. मात्र, सुरक्षा रक्षकांना गुंगारा देत ते तिथून निसटून गेले. दोन तासांहून अधिक चाललेल्या या नाट्यमय घडामोडीनंतर अखेर त्या दोघांना पकडण्यात यश आलं. सुरक्षारक्षकांनी त्यांना ताडदेव पोलिसांच्या ताब्यात दिलं आहे.
वाचाः नवजात बाळाची विक्री करण्यासाठी ट्रेनमध्ये बसले, एक चूक झाली अन् पोलिसांच्या तावडीत अडकले
पोलिसांनी या दोघांची चौकशी केल्यानंतर त्यांनी सांगितलं की, ते पायऱ्यावरुन इमारतीच्या ५८व्या मजल्यापर्यंत गेले होते. तिथून स्टंट करत ते इमारतीवरुन खाली येणार होते. त्यांना या स्टंटचा व्हिडओ रेकॉर्ड करायचा होता. पण त्याआधीच सुरक्षा रक्षकांच्या ही बाब लक्षात आली आणि त्यांनी त्यांना ताब्यात घेतलं.
वाचाः पोलिसाने ५० वेळा शारीरिक संबंध ठेवले…; पीडितेवर ओढावलेला प्रसंग ऐकून थरकाप उडेल
पोलिसांना या दोघांना ताब्यात घेतलं असून खासगी मालमत्तेत घुसखोरी करणे, जीव धोक्यात घालून स्टंट व्हिडीओ रेकॉर्ड करण्याचा प्रयत्न करणे या कलमांखाली पोलिसांनी गुन्हा नोंदवला आहे. ताडदेव पोलिसांनी या संपूर्ण प्रकाराची माहिती रशियन दूतावासाला देखील दिली आहे.
वाचाः नव्या समीकरणाची नांदी; वंचित आघाडी महाविकास आघाडीत सामील होणार? ठाकरे गटाच्या नेत्याने दिले स्पष्ट संकेत