झगमगत्या मुंबईतही ‘वाळीत’प्रथेचा काळोख; बोरीवलीतील एका कटुंबाला गावातून केले बहिष्कृत

म. टा. खास प्रतिनिधी, मुंबईः मुंबईसारख्या महानगरातील एक उपनगर असलेल्या बोरिवलीतील शिंपोली गावाने एका कुटुंबाला वाळीत टाकल्याचे समोर आले आहे. या कुटुंबाने पोलिसांत केलेली एक तक्रार मागे न घेतल्याने गावदेवी ग्रामस्थ मंडळाने गावकऱ्यांची बैठक घेऊन या कुटुंबाला बहिष्कृत करण्याचा ठराव मंजूर केला. गावातील कोणत्याही कार्यक्रमात सहभागी होण्यास तुम्हाला मनाई करण्यात आली आहे, असे सांगणारे पत्र या कुटुंबाला धाडण्यात आले आहे. ही कृती बेकायदा असल्याने कुटुंबाने पोलिसांत धाव घेतली असून, बोरिवली पोलिसांनी सहा जणांसह गावदेवी ग्रामस्थ मंडळावर गुन्हा दाखल केला आहे.

शिंपोली गावातील एका महिलेने याच गावात राहणाऱ्या तिघांविरुद्ध विनयभंग तसेच इतर आरोप करीत पोलिसांत तक्रार केली होती. या तक्रारीवरून १६ एप्रिल २०२२ रोजी पोलिस ठाण्यात तिघांविरुद्ध गुन्हा दाखल करण्यात आला. ही तक्रार मागे घेण्यासाठी गावदेवी ग्रामस्थ मंडळाने २२ एप्रिल रोजी एक बैठक बोलवली. या बैठकीला महिला आणि तिच्या कुटुंबियांना बोलावण्यात आले. तक्रार मागे घेण्यासाठी त्यांच्यावर दबाव टाकण्यात आला; मात्र काहीही झाले तरी तक्रार मागे घेणार नाही, असा पवित्रा या कुटुंबाने घेतला. यानंतर गावातील रहिवाशांनी आपल्याला त्रास देण्यास सुरुवात केली, असा आरोप या कुटुंबाने केला आहे

काही दिवस गेल्यानंतर मे महिन्यात गावदेवी ग्रामस्थ मंडळाकडून या कुटुंबाला एक पत्र आले. मंडळाची पुन्हा बैठक घेण्यात आली. या बैठकीत आपल्या कुटुंबाला बहिष्कृत करण्याचा ठराव सर्वानुमते मंजूर करण्यात आला आहे. त्यामुळे यापुढे गावातील कोणत्याही समारंभात, तसेच सुखदुःखाच्या कार्यक्रमात सहभागी होण्यास तुम्हाला मनाई करण्यात येत आहे, असे या पत्रात नमूद करण्यात आले होते. या पत्रानंतर मे महिन्यात गावामध्ये गावदेवीचा पालखी सोहळा पार पडला. देवीची पालखी या कुटुंबाच्या घराजवळ नेण्यात आली नाही. गावकरी आणि ग्रामस्थ मंडळाची वागणूक बेकायदा असल्याने या कुटुंबाने पोलिसांत धाव घेतली. त्यांच्या तक्रारीवरून बोरिवली पोलिसांनी सामाजिक बहिष्कार प्रतिबंधक कायद्यान्वये सहा गावकरी आणि गावदेवी ग्रामस्थ मंडळावर गुन्हा दाखल केला आहे.