अजित पवार…माफी मागा अन्यथा राजीनामा द्या; संभाजी महाराजांबाबतच्या वक्तव्यावरून भाजप आक्रमक

नाशिक : राष्ट्रवादीचे नेते आणि विधानसभेचे विरोधी पक्षनेते अजित पवार यांनी विधिमंडळाच्या हिवाळी अधिवेशनादरम्यान सभागृहामध्ये छत्रपती संभाजी महाराज यांच्याबाबत केलेल्या वक्तव्यावरून आता राज्यात नवा वाद निर्माण झाला आहे. नाशिकमध्ये आज भाजप अध्यात्मिक आघाडीचे प्रदेशाध्यक्ष आचार्य तुषार भोसले यांनी पत्रकार परिषदेत घेऊन अजित पवार यांच्यासह उद्धव ठाकरे आणि आदित्य ठाकरे यांच्यावरही निशाणा साधला आहे.

‘आपण छत्रपती संभाजी महाराज यांचा उल्लेख स्वराज्यरक्षक असा करतो. मात्र, त्यांना काही लोक धर्मवीर म्हणत आहेत. छत्रपती संभाजी महाराजांनी कधीही धर्मावरुन राज्य केलं नाही,’ असं वक्तव्य अधिवेशनात अजित पवारांनी केले होते. या विधानावर आक्षेप घेत अजित पवारांनी धर्मवीर संभाजी महाराज यांचा अपमान केला असून त्यांना विरोधी पक्षनेतेपदावर राहण्याचा नैतिक अधिकार नाही, त्यांनी राजीनामा द्यावा, अशी मागणी तुषार भोसले यांनी केली आहे. ते पत्रकार परिषदेत बोलत होते.

वाढदिवसाच्या पार्टीचं बिल मागितलं, आमदार पुत्राची व्यावसायिकाला हातपाय तोडण्याची धमकी

‘धर्मवीर छत्रपती संभाजी महाराज हे हिंदू समाजाचा स्वाभिमान आहेत, हिंदू समाजाची अस्मिता आहेत. काल विधानसभेत विरोधी पक्षनेते अजित पवार म्हणतात की, छ्त्रपती संभाजीराजे हे धर्मवीर नव्हते. विरोधी पक्षनेते हे पद जनतेच्या भावना सभागृहात मांडण्यासाठी असतं. पण जनतेच्या भावना दुखावण्याचा प्रयत्न अजित पवारांनी केला आणि विरोधी पक्षनेते या पदाला काळा डाग लावला आहे. त्यामुळे आमची मागणी आहे की, त्यांनी तात्काळ विरोधी पक्षनेतेपदाचा राजीनामा द्यावा. धर्मवीर संभाजी महाराज यांचा अपमान केल्यामुळे या पदावर राहण्याचा नैतिक अधिकार नाही. ते धर्मवीर नव्हते, असं म्हणण्याचा अधिकार तुम्हाला दिला कुणी? तुमच्या घरातले विचार आमच्या महापुरुषांवर थोपवण्याचा तुम्हाला अधिकार नाही. त्यामुळे तातडीने माफी मागा किंवा राजीनामा द्या,’ अशी मागणी तुषार भोसले यांनी यावेळी केली.

थर्टी फर्स्टच्या पार्टीसाठी लोणावळ्यात जाताय? प्रशासनाने दिला आहे महत्त्वाचा आदेश, ही बातमी वाचाच

पत्रकार परिषदेत पुढे बोलताना तुषार भोसलेंनी अजित पवार यांचे १४ मे २०१९ रोजी केलेले ट्वीट दाखवले. ते म्हणाले की, ‘अजित पवार हे २०१९ पर्यंत धर्मवीर संभाजी महाराज यांना धर्मवीर मानायला तयार होते. मात्र २०२२ मध्ये त्यांना आता कोणती उपरती आली, की ते संभाजी महाराज यांना धर्मवीर मानायला तयार नाहीत. माजी मुख्यमंत्री उद्धव ठाकरे आणि आदित्य ठाकरे यांनाही प्रश्न विचारायचा आहे. उद्धव ठाकरे आणि आदित्य ठाकरे हे पण आपली भूमिका बदलणार का? ते आपली भूमिका बदलणार नसतील तर ते अजित पवार यांचा निषेध करणार का? संजय राऊत यांची दातखीळ बसली आहे का?’ असा खरपूस सवालही भोसले यांनी केला.

काय म्हणाले होते अजित पवार ?

अधिवेशनात महापुरुषांच्या अवमानाबद्दल अजित पवार बोलत होते. त्यावेळी ते म्हणाले की, ‘महापुरुषांच्या अवमानाबद्दल मुख्यमंत्री एकनाथ शिंदे यांनी एकही शब्द काढला नाही. आपण छत्रपती संभाजी महाराज यांचा उल्लेख स्वराज्यरक्षक असा करतो. मात्र, त्यांना काही लोक धर्मवीर म्हणत आहेत. छत्रपती संभाजी महाराजांनी कधीही धर्मावरुन राज्य केलं नाही. छत्रपती शिवाजी महाराज यांचंही हिंदवी स्वराज्य होतं,’ असं भाष्य अजित पवारांनी केलं होतं.