Tej Police Times
म. टा. विशेष प्रतिनिधी, मुंबईः नवीन वर्षात महापालिकेला आपल्या जमिनींच्या पुनर्विकासातून घसघशीत लाभ होणार आहे. चेंबूर-देवनार येथील एका भूखंडाच्या पुनर्विकासातून तब्बल दोन हजारांहून अधिक घरे पालिकेला मिळणार आहेत. ३०० चौरस फुटांची ही घरे असून या प्रकल्पासाठी ७०९ कोटी ७७ लाख रुपये पालिका खर्च करणार आहे. पालिका आयुक्त व प्रशासक इकबालसिंह चहल यांनी या प्रस्तावाला मंजुरी दिली.
या भूखंडावर कर्मचारी वसाहत बांधून त्यात प्रकल्पग्रस्तांसाठी काही घरे राखीव ठेवली जाणार आहेत. पालिकेतर्फे रस्ते रूंदीकरण, नाले खोलीकरण व विस्तार, उड्डाणपूल यांसह विविध प्रकल्प राबवण्यात येतात. या ठिकाणी असलेली घरे व दुकाने बाधित होत असल्याने प्रकल्पबाधितांना पर्यायी जागा देणे कायद्यानुसार बंधनकारक आहे. प्रकल्पबाधितांसाठी शहर आणि उपनगरात १४ हजार सदनिका बांधण्याची प्रशासकीय प्रक्रिया पूर्ण झाली आहे. भविष्यात प्रकल्पबाधितांना पर्यायी घरे देण्यासाठी ४० हजार घरांची गरज भासणार आहे. त्यासाठी प्रशासनाकडून अधिकाधिक घरे बांधण्याचा व विविध प्रकल्पातून मिळवण्याचा प्रयत्न सुरू आहे. चेंबूर विभागात मालमत्ता विभागाच्या नगर भूमापन क्रमांक १ (भाग) आणि क्रमांक ३ (भाग), मौजे देवनार भूखंडावर २२ मजली सहा इमारती बांधल्या जाणार आहेत. यामध्ये पार्किंग व इतर सुविधा या ठिकाणी प्रस्तावित आहे, अशी माहिती या प्रस्तावात देण्यात आली आहे.
४१ हजार रुपये चौरस मीटर
ए.जी.एस.ए. इन्फ्रा अँड कन्स्ट्रक्शन कंपनीला हे कंत्राट मिळाले असून पालिकेने अंदाजित केलेल्या दरापेक्षा ३.९६ टक्के अधिक दराने हे काम संबंधित कंत्राटदाराला मिळाले आहे. बांधकामासाठी ४१ हजार ५८४ रुपये प्रतिचौरस मीटर दर कंत्राटदार आकारणार आहे.
असा होणार पुनर्विकास
२२ मजल्यांच्या ६ इमारती
३०० चौरस फुटांची घरे
२०६८ सदनिका
खर्च ७०९ कोटी ७७ लाख
प्रकल्पात सुविधा काय?
दुकाने, बालवाडी, बहुउद्देशीय सभागृह, वेल्फेअर सेंटर, व्यायामशाळा, मुलांचे संगोपन केंद्र, सांडपाणी पुनर्प्रक्रिया प्रकल्प, बोअरवेल, इंटरनेट सुविधा,
रेन वॉटर हार्वेस्टिंग,अग्निसुरक्षा यंत्रणा