आमदार योगेश कदमांच्या अपघात प्रकरणात नवा ट्विस्ट; चालक फरार, घातपाताचा संशय

रत्नागिरी : मुख्यमंत्री एकनाथ शिंदे यांच्या नेतृत्वाखालील बाळासाहेबांची शिवसेना या पक्षाचे दापोली खेड मंडणगड विधानसभा मतदारसंघाचे आमदार योगेश कदम यांच्या कारला शुक्रवारी रात्री अपघात झाला. मात्र हा घातपात असल्याचा संशय आता आमदार कदम यांच्या कार्यकर्त्यांकडून व्यक्त केला जात आहे. आमदार योगेश कदम यांचे निकटवर्तीय व शिवसेनेच्या शिंदे गटाच्या कार्यकर्त्यांनी याप्रकरणी सखोल चौकशीची मागणीही केली आहे.

आमदार योगेश कदम हे शुक्रवारी रात्री मतदारसंघातील आपले कार्यक्रम आटोपून मुंबईच्या दिशेला जात असताना १० वाजता सुमारास कशेडी घाटात टँकरने कदम यांच्या कारला पाठीमागून धडक दिल्याने हा अपघात झाला. अपघातानंतर टँकर पलटी झाला असून टँकरचालक फरार झाला आहे. सदर अपघात इतका भीषण होता की कदम यांच्या कारचा चक्काचूर झाला. मात्र सुदैवाने आमदार कदम आणि त्यांचे सहकारी या अपघातातून सुखरूप बचावले आहेत. कदम यांचे चालक दीपक कदम आणि सुरक्षेसाठी असलेल्या दोन पोलिसांना किरकोळ जखम झाली आहे.

गृहखरेदी आता बिनधोक! महारेराकडे नोंदणीवेळी प्रवर्तकांनी ‘हे’ काम करणे बंधनकारक

अपघातानंतर योगेश कदम नक्की काय म्हणाले?

या अपघातानंतर आमदार योगेश कदम यांनी आपली पहिली प्रतिक्रिया दिली. ‘मी सुखरूप आहे, काळजी करू नका,’ असं आवाहन कदम यांनी आपल्या कार्यकर्त्यांना केलं. आई जगदंबेच्या कृपेने आम्ही सर्व सुखरूप असल्याचा संदेश त्यांनी व्हिडिओ शेअर करून दिला आहे. तसंच माझे पुढील कार्यक्रम ठरल्यानुसार होतील, अशी माहितीही त्यांनी दिली.