जनावर आडवं आलं आणि होत्याचं नव्हतं! १९ वर्षीय विद्यार्थ्याचा बाईक अपघातात मृत्यू

ही घटना वरुड गावालगत २८ डिसेंबर रोजी घडली होती. अंधेरा पोलीस स्टेशन अंतर्गत येणाऱ्या मेरा बुद्रुक येथील रहिवासी असलेले शिवप्रसाद शंकर वायाळ, देवेंद्र उद्धव पडघान व ऋषी दत्तात्रय पडघान हे तीन विद्यार्थी बी.एस.सीचा पेपर देण्यासाठी आदर्श विद्यालय माहोरा तालुका जाफराबाद येथे २८ डिसेंबर रोजी सकाळी गेले होते.

पेपर देऊन सायंकाळी घरी परत असताना वरूड या गावालगत त्यांच्या वाहनासमोर काहीतरी अचानक जनावर आडवे आल्याचा भास झाल्याने त्यांची मोटार सायकल भरधाव वेगात समोरच्या विद्युत पोल जाऊन धडकली. यात तिघे जण गंभीर अवस्थेत रोडच्या कडेला पडले होते.

हा प्रकार रोडने जाणाऱ्या प्रवाशांनी पाहिला आणि अनेक जण गोळा झाले. जखमींची विचारपूस केली असता तिन्ही विद्यार्थी मेरा बुद्रुक गावचे असल्याचे कळाले. अपघातात गाडी चालवत असलेला शिवप्रसाद शंकर वायाळ (वय २० वर्ष) याचा डोक्याला गंभीर मार लागल्याने मानेचा मनका मोडला होता. तर त्याच्या गाडीवर मागे बसलेल्या दोघा जणांना गंभीर मार लागला होता.

जखमींना घेऊन उपचारासाठी चिखली येथील जंजाळ यांच्या रुग्णालयात दाखल केले. परंतु हा अपघात नेमका कशामुळे झाला हे मात्र अद्यापपर्यंत कळू शकले नाही.

तिन्ही विद्यार्थ्यांच्या घरची परिस्थिती फार हलाखीची असल्याने शंकर वायाळ, ग्रामपंचायत सदस्य भारत पडघन, माजी सैनिक वायाळ, बहीण ज्योती लोखंडे यांनी पैशाअभावी विद्यार्थ्यांना औरंगाबाद येथे हलविले. मात्र औरंगाबाद येथे काही फरक जाणवत नसून खर्च वाढत असल्यामुळे तिथून त्यांना पुढील उपचारासाठी नगर येथील विखे पाटील यांच्या रुग्णालयात दाखल केले.

हेही वाचा : हाता-तोंडाशी आलेला पोरगा गेला, मुंबई गोवा हायवे अपघातात २५ वर्षीय बाईकस्वाराचा अंत

तिघांवर रुग्णालयात उपचार सुरू असताना शिवप्रसाद शंकर वायाळ याचा १२ जानेवारी मृत्यू झाला. तर देवेंद्र उद्धव पडघन आणि ऋषी दत्तात्रय पडघन यांच्यावर रुग्णालयात उपचार सुरू आहेत. तिन्ही विद्यार्थ्यांच्या घरची परिस्थिती हलाखीची असून मृतक शिवप्रसाद शंकर वायाळ हा आई-वडिलांचा एकटा मुलगा असल्यामुळे मेरा बुद्रुक गावात शोककळा पसरली आहे. या घटनेने सर्वत्र हळहळ व्यक्त केली जात आहे.

हेही वाचा : VIDEO | नेपाळ विमान अपघातापूर्वीची ५० सेकंदं! भारतीय तरुणाच्या कॅमेरात शहारे आणणारा व्हिडीओ