सासऱ्यांवर काळाची झडप, जावईबापू गंभीर जखमी, बाईक अपघातात मायलेकीवर दुःखाचा डोंगर

परभणी : समोरून येणाऱ्या वाहनाने बाईकला जोरदार धडक दिल्याने झालेल्या अपघातात सासऱ्याचा मृत्यू झाला आहे, तर जावई गंभीर जखमी झाला आहे. ही घटना परभणीच्या जिंतूर तालुक्यातील गणेशपुर – वाघी रस्त्यावरील मोळा पाटी जवळ घडली आहे. ज्ञानेश्वर अंबादास चव्हाण (वय ४२ वर्षे) असे अपघातामध्ये मयत झालेल्या व्यक्तीचे नाव आहे तर बाळू राठोड हे अपघातामध्ये गंभीर जखमी झाली आहेत.

जिंतूर तालुक्यातील कवडा येथील ज्ञानेश्वर अंबादास चव्हाण आणि बाळू राठोड हे सासरा आणि जावई दुचाकीवरून पाथरी येथून कवडा येथे येत होते. त्यांची दुचाकी जिंतूर तालुक्यातील गणेशपुर – वाघी रस्त्यावरील मोळा पाटी जवळ आली असता समोरून येणाऱ्या अज्ञात वाहनाने त्यांच्या दुचाकीला जोराची धडक दिली.

ज्ञानेश्वर अंबादास चव्हाण आणि बाळू राठोड हे गंभीर जखमी झाले. अपघातानंतर घटनास्थळी असलेल्या नागरिकांनी जखमी जावई आणि सासर्‍याला उपचारासाठी जालना येथे पाठविले. मात्र ज्ञानेश्वर चव्हाण यांचा रस्त्यामध्येच मृत्यू झाला. तर जावई बाळू राठोड गंभीर जखमी झाल्यामुळे त्याला पुढील उपचारासाठी औरंगाबाद येथील घाटी रुग्णालयामध्ये हलवण्यात आले आहे.

हेही वाचा : एसटीचा स्टेअरिंग रॉड तुटला, भीषण अपघात; रक्तबंबाळ अन् विव्हळणाऱ्या प्रवाशांचा मदतीसाठी धावा

मयत ज्ञानेश्वर चव्हाण यांच्या मृतदेहाचे मंठा येथे शवविच्छेदन केल्यानंतर मृतदेह नातेवाईकांच्या स्वाधीन करण्यात आला. त्यांच्यावर कवडा येथे अंत्यसंस्कार करण्यात आले. घटनेविषयी माहिती घेण्यासाठी चारठाणा पोलिसांना संपर्क साधला असता सदरील अपघाताची अद्याप पर्यंत नोंद झाली नसल्याची माहिती देण्यात आली आहे.

हेही वाचा : हसतमुख गुरुजींची डोळ्यात पाणी आणणारी एक्झिट, ट्रकखाली चिरडून मुख्याध्यापकांचा अंत