Tej Police Times
डोंबिवली : गेल्या तीन वर्षांपासून लहान-मोठ्या चोऱ्या करणारा चोरटा रस्त्याच्या कडेला, इमारतींच्या आवारात पार्क केलेल्या दुचाकी चोरण्यात पारंगत झाला. याच दरम्यान तो एका तरुणीच्या प्रेमात पडला. या तरुणीवर पैसा उधळण्यासाठी त्याने चोऱ्यांचा सपाटा लावला. चोरलेल्या दुचाकी मिळेल त्या किंमतीत विकून आलेला पैसा प्रेयसीवर उधळू लागला. मात्र क्राईम ब्रँचचे कॉन्स्टेबल गुरूनाथ जरग यांची तीक्ष्ण नजर या चोरट्यावर पडली आणि चोऱ्यामाऱ्या करून अय्याशी जीवन जगणाऱ्या या चोरट्याला आता पोलीस कोठडीनंतर जेलची हवा खावी लागणार आहे. आरोपीचे नाव शुभम पवार असून तो फक्त १९ वर्षाचा आहे.
यातील आरोपी डोंबिवली मधील कोळेगाव मानपाडा याठिकाणी येणार असल्याची गुप्त माहिती पोलिसांना मिळाली असता पोलिस अंमलदार गुरुनाथ जरग, पोलीस हवालदार अनुप कामत, विनोद चन्ने यांनी सदर ठिकाणी सापळा रचत शुभम पवार या १९ वर्षीय आरोपीला ताब्यात घेतले. त्याच्याकडे चौकशी केली असता त्याने मागील दोन वर्षात १३ दुचाकी चोरल्या असल्याचे कबूल केले.
पोलिसांनी १६ लाख ५ हजार किंमतीच्या १३ दुचाकी विविध शहरातून हस्तगत केल्या असून विविध पोलीस ठाण्यातील १३ गुन्हे उघडकीस आणले आहे. तसेच आरोपी शुभम पवार हा प्रेयसीवर पैसे खर्च करण्यासाठी महागातील गाड्या चोरून विकत असल्याचे पोलीस तपासात उघड झाले आहे.
हेही वाचा : विवाहाच्या तोंडावर लग्नघराला आग, बस्ता पेटला, लाखोंची रोकड भस्मसात, स्वप्नांची राख
या चोरट्याने कल्याणच्या महात्मा फुले चौक पोलिस ठाण्याच्या हद्दीतून ५, कोळसेवाडी पोलिस ठाण्याच्या हद्दीतून १, डोंबिवलीच्या रामनगर पोलिस ठाण्याच्या हद्दीतून २, विष्णूनगर पोलिस ठाण्याच्या हद्दीतून २ आणि भिवंडीतील कोनगाव पोलिस ठाण्याच्या हद्दीतून ३ दुचाकी चोरल्याचे निष्पन्न झाल्या आहेत. क्राईम ब्रँचच्या या कारवाईमुळे अनेक गुन्ह्यांची उकल होण्याची चिन्हे आहेत.
हेही वाचा : सोलापूरच्या तरुणांचा आंध्रात भीषण अपघात, तिरुपती दर्शनाहून परतताना काळाचा घाला, चौघं ठार