शिवलिंगाला नमस्कार, फुलं वाहिली, नंतर दानपेटीवर डल्ला; औरंगाबादच्या चोरांची राज्यात चर्चा

जिल्ह्यातील गंगापूर तालुक्यातील असलेल्या पाचपीर गावात जुने महादेवाचे मंदिर आहे. हे मंदिर पंच क्रोशितील भाविकांचे श्रद्धास्थान आहे. जिल्हा भरातून भाविक येथे दर्शनासाठी येतात. त्यामुळे येणाऱ्या भाविकांची संख्या पाहता सहाजिकच मंदिराच्या दानपेटीत चांगली रक्कम जमा होते. याच रकमेवर वाईट नजर ठेऊन सीसीटीव्हीत दर्शविल्यानुसार २२ जानेवारी रोजी १२ वाजून २४ मिनिटांनी दोन चोरट्यांनी मंदिराच्या गाभाऱ्यात प्रवेश केला. ओळख पटू नये यासाठी एकाने चेहरा झाकला होता. तर दुसऱ्याने चेहरा लपवला नव्हता.

मंदिरात प्रवेश करताच त्यातील एकाने शिवलिंगासमोर असलेली काही फुलं उचलली आणि ती पिंडीवर वाहून नमस्कार करीत असतानाच दुसऱ्या चोरट्याने गाभाऱ्यात प्रवेश केला. त्याने वाकून पिंडीला नमस्कार केला. यानंतर पहिल्या चोरट्याने आपला मोर्चा दान पेटीकडे वळविला. त्या मागोमाग दुसरा देखील पोहोचला, दानपेटी कुलूप लावलेलं नसल्याने दोघांनी एका नंतर एक दानपेटीमध्ये हात टाकून रक्कम काढून घेतली आणि मंदिरातून निघून गेले.
दुसऱ्यादिवशी हा प्रकार समोर आला. मंदिर प्रशासन आणि गावकऱ्यांनी आता कारवाईची मागणी केली असून त्वरित चोरट्यांना अटक करा अशी मागणी होत आहे. मात्र, या देवभोळ्या चोरांची जिल्हाभर चर्चा सुरु आहे.