सलमान भाई आई मला सोडून गेली… आईचा निधनानंतर राखी सांवतने फोडला टाहो; काळजात चर्रर करणारा Video

राखी सावंतला सलमान खान आणि सोहेल खान यांनी तिच्या आईच्या कॅन्सर उपचारांसाठी मदत केली होती. अनेकदा सलमानचे आभार राखीने मानले होते. त्यामुळे आईच्या निधनानंतही अभिनेत्रीने सलमान खानची आठवण काढली. ‘सलमान भाई, आई मला सोडून गेली’, असे म्हणत तिने मीडियासमोरच टाहो फोडला. अभिनेत्रीचे समोर आलेले व्हिडिओ काळजात चर्रर कऱणारे आहेत. या घटनेनंतर तिला सावरणेही कठीण झाले आहे. सोशल मीडियावर समोर आलेल्या व्हिडिओत राखी धाय मोकलून रडते आहे. नेहमी हसत आणि हसवत असणाऱ्या राखीला अशा स्थितीत पाहून मन हेलावल्याच्या प्रतिक्रिया समोर येत आहेत.

बिग बॉस मराठीमधून बाहेर पडल्यानंतर राखीने एक व्हिडिओ शेअर करत तिच्या आईच्या तब्येतीविषयी माहिती दिलेली. यावेळी तिने तिच्या आईला ब्रेन ट्युमर झाल्याचे सांगितले होते. त्यावेळी राखीच्या चाहत्यांनी आणि इंडस्ट्रीतील अनेकांनी अभिनेत्रीच्या आईला बरे वाटावे याकरता प्रार्थना केलेली. तिच्या मदतीसाठी अनेकांनी मदतीचा हात पुढे केलेला. अभिनेत्रीला मदत करणाऱ्यांमध्ये अंबानी कुटुंबाचे नावही समोर आलेले, अभिनेत्रीने पापाराझींना स्वत: याविषयी माहिती दिली होती.

हे वाचा-Tiranga: राजकुमार यांच्यासोबत काम करायचं नव्हतं! या अटीवर नानांनी दिला होकार

२८ जानेवारी रोजी अभिनेत्रीच्या आईने निधन झाल्यानंतर राखीचा जो व्हिडिओ समोर आलाय, तो मन हेलावून टाकणारा आहे. रडून-रडून तिची अवस्था अत्यंत बिकट झाली आहे. तिच्या आईचा मृतदेह रुग्णालयातून रुग्णवाहिकेपर्यंत नेण्यादरण्यानचा हा व्हिडिओ आहे. यावेळी राखीचे नातेवाईक अभिनेत्रीला सावरण्याचा प्रयत्न करतायंत, पण तिच्या डोळ्यातील अश्रू थांबण्याचे नाव घेत नाहीयेत. तिच्या नातेवाईकांमध्ये अभिनेत्रीचा भाऊ राकेश सावंतही दिसतो आहे.

अभिनेत्रीचा आणखी एक व्हिडिओ समोर आला, ज्यात तिने अभिनेता सलमान खानची आठवण काढली आहे. आईच्या निधनानंतर राखीने मीडियासमोरच टाहो फोडला. ‘आई गेली… सलमान भाई, आई मला सोडून गेली…’, असं म्हणत राखी रडत होती.