Tej Police Times
मुंबई- आपल्या अभिनयाने आणि सौंदर्याने प्रेक्षकांना भुरळ पाडणारी लोकप्रिय अभिनेत्री सोनाली कुलकर्णी सोशल मीडियावर प्रचंड सक्रिय असते. ती नेहमीच आपले फोटो आणि व्हिडीओ चाहत्यांसोबत शेअर करत असते. तिच्या फोटो आणि व्हिडिओंना चाहते भरभरून प्रतिसाद देत असतात. सोनाली तिच्या अभिनयासोबतच तिच्या नृत्यकलेसाठीही चाहत्यांमध्ये लोकप्रिय आहे. तिला नृत्य करताना पाहणं म्हणजे चाहत्यांसाठी एक पर्वणी असते. मात्र आता मराठी चित्रपटसृष्टीमधील या अप्सरेने आपली नृत्यकला दाखवण्यासाठी एक हटके जागा शोधली आहे. सोनाली चक्क राजस्थानमधील वाळवंटात पोहोचली आहे आणि तिथे १० अंश तापमानात ती नृत्य करताना दिसत आहे. तिचा हा व्हिडिओ सोशल मीडियावर व्हायरल झाला आहे.
सोनाली राजस्थानमधील जैसलमेर येथे गेली आहे. तिथले अनेक फोटो तिने चाहत्यांसोबत शेअर केले. त्यातच तिने एक व्हिडिओही शेअर केला. तेथील वाळवंटात ती नृत्य करताना दिसतेय. तिच्यासोबत लोकप्रिय नृत्य दिग्दर्शिका फुलवा खामकरदेखील आहे. त्या दोघी राजस्थानातील थंडीत वाळूवर लोकप्रिय अभिनेत्री श्रीदेवी यांच्या एव्हरग्रीन गाणं ‘चुडिया खनक गयी’ या गाण्यावर नृत्य करताना दिसतायत. अतिशय सुंदर असा हा व्हिडिओ शेअर करत सोनालीने लिहिलं, ‘१० अंश तापमानात नाचायची हौस. अर्थात आम्ही फिल्मी आहोत, डान्सर्स आहोत, श्रीदेवी फॅन्स आहोत आणि वेड्या तर आहोतच. म्हणून २०- २० रिटेक केल्या. तोल जात होता, घसरत होतो, पडत होतो तरी मज्जा करत होतो.’
यासोबतच तिने त्यांच्या कॅमेरामॅनला देखील त्याच्या संयमासाठी धन्यवाद दिले. त्यांच्या या व्हिडिओवर चाहत्यांनी लाइक आणि कमेंटचा पाऊस पाडला आहे. खूप छान झालाय व्हिडिओ असं म्हणत त्यांनी सोनालीचं आणि फुलवाचं कौतुक केलं आहे.