Tej Police Times
हम्पी- कर्नाटकातील हम्पी महोत्सवादरम्यान प्रसिद्ध गायक कैलाश खेर यांच्यावर पाण्याची बाटली फेकण्यात आली. कैलाश खेर स्टेजवर परफॉर्म करत असताना दोन तरुणांनी त्यांना कन्नड गाणे गाण्यास सांगितले आणि त्यांच्यावर पाण्याची बाटली फेकली. रविवारी संध्याकाळी हा धक्कादायक प्रकार घडला. गायकावर बाटली फेकल्याप्रकरणी पोलिसांनी दोन्ही आरोपींना ताब्यात घेतले.
बॉलिवूड आणि कन्नड सिनेक्षेत्रातील अनेक बड्या कलाकारांनी या कार्यक्रमात परफॉर्म केले. यामध्ये जागतिक वारसा असलेल्या स्थळाचे वैभव दाखविण्यासाठी साऊंड अँड लाईट शोचेही आयोजन करण्यात आले होते. कन्नड गायक अर्जुन, जन्या, विजय प्रकाश, रघु दीक्षित आणि अनन्या भट यांनी कार्यक्रमात विशेष परफॉर्मन्स दिला. याशिवाय बॉलिवूडमधून अरमान मलिक आणि कैलाश खेर या गायकांनी लोकांचं मनोरंजन केलं.
तीन दिवस चाललेला हम्पी महोत्सव २७ जानेवारीपासून सुरू झाला. विजयनगर जिल्ह्याच्या निर्मितीनंतर प्रथमच तेथे सांस्कृतिक कार्यक्रमाचे आयोजन करण्यात येत आहे. या कार्यक्रमाचे उद्घाटन शुक्रवारी कर्नाटकचे मुख्यमंत्री बसवराज बोम्मई यांच्या हस्ते झाले. दरम्यान, कर्नाटकातील हम्पी महोत्सवात सहभागी होण्यापूर्वी, कैलाश खेर यांनी लखनऊमध्ये उत्तर प्रदेश दिवसाच्या दिवशीही सादरीकरण केले. यावेळी त्यांनी अनेक सुफी गाणी गायली.