सीमा तुझ्या मांडीवर श्वास सोडायचा आहे… रमेश देवांनी व्यक्त केलेली काळजात चर्रर करणारी इच्छा

रमेश आणि सीमा देव यांनी टीव्ही९ मराठीला एक मुलाखत दिली होती. सोशल मीडियावर या मुलाखतीमधील एक व्हिडिओ व्हायरल होत असून यावेळी देव यांनी केलेलं भाष्य मन हेलावून टाकणारे आहे. रमेश देव यांची एक इच्छा होती आणि ती त्यांनी सीमा यांच्यासमोर व्यक्त केली. ते म्हणाले होते की, ‘लग्नाची ५३ वर्ष आणि त्याआधीची चार ते पाच वर्ष आपण एकमेकांना ओळखत आहोत. इतकी वर्ष तू मला साथ दिलीस, आता माझी एक इच्छाही पूर्ण कर. मी ९३ वर्षांचा आहे, त्यामुळे कधी जाईन काही माहीत नाही.’ रमेश देव अशाप्रकारे भावुक झाल्यानंतर सीमी देव त्यांना रोखण्याचा प्रयत्न करतात. त्यांच्याही डोळ्यात पाणी तरळते.

यावर रमेश देव पुढे म्हणतात की, ‘माझी एकच इच्छा आहे की माझा शेवटचा श्वास तुझ्या मांडीवर जावा. माझी तेवढी इच्छा तू पूर्ण कर.’ देव यांचं वाक्य नक्कीच भावुक करणारं होतं. रमेश देव यांनी अशी इच्छा व्यक्त करण्यामागचं प्रेम स्पष्टपणे त्यांच्या चेहऱ्यावर दिसत होते. यावेळी आसवं रोखत सीमा त्यांना धीर देतात आणि असं काही होणार नाही असा विश्वास देतात. सीमा यांना रडताना पाहून रमेश देव अत्यंत सामंज्यसाने परिस्थिती हाताळतात. नव्वदीनंतरही या जोडप्यामध्ये जे सामंजस्य आणि प्रेम होतं, ते तरुण पिढीला नक्कीच प्रेरणा देणारं आहे.

हे वाचा-रमेश देव यांच्या एका वाक्यावर सारंकाही ऐकायच्या सीमा देव

पत्नीची समजूत काढण्यासाठी रमेश पुढे म्हणतात की, ‘अगं कधी ना कधी सगळ्यांनाच जायचं आहे. तू किंवा मी अजरामर होऊन आलो आहोत का? पण माझी ती इच्छा भयंकर आहे की संपूर्ण आयुष्य जिच्यासोबत घालवलं तिच्या मांडीवर अखेरचा श्वास घ्यावा.’