बलदंड शरीर डोळ्यात आग, एका नजरेत सगळे राख! ललित प्रभाकरच्या ‘टर्री’चा ट्रेलर प्रदर्शित

‘टर्री’ या चित्रपटात ललितसोबत अभिनेत्री गौरी नलावडे मुख्य भूमिकेत आहे. चित्रपटात ललित एकदम टेरर भूमिकेत असणार याचा अंदाज चित्रपटाच्या टीझरवरूनच आला होता. आता या चित्रपटाच्या ट्रेलरमध्ये त्याचा आणखीनच खतरनाक लूक समोर आला आहे. ट्रेलरमध्ये ललित एखाद्या दाक्षिणात्य अभिनेत्याप्रमाणे दिसत आहे. डोळ्यात आग, व्यायामाने कमावलेलं पिळदार शरीर, एका मुक्क्यातच समोरच्याला गार करणारा ललित यात पाहायला मिळतोय. जबरदस्त अ‍ॅक्शन आणि स्टंट, त्याच्यासोबत हटके कथा आणि या सगळ्याच्या जोडीला सुंदर आणि सालस गौरी प्रेक्षकांचं मन जिंकताना दिसतेय. ‘हाडं तुटल्याचा आवाज आल्याशिवाय कुणाला मारल्यासारखं वाटत नाही आपल्याला’ हा ललितचा डायलॉग त्याची दहशत दाखतोय. एकूणच चित्रपटाचा ट्रेलर एकदम धमाकेदार आहे.

ट्रेलर प्रदर्शित होताच नेटकऱ्यांनी शुभेच्छांचा वर्षाव केला आहे. त्याचा हा अवतार प्रेक्षकांच्या पसंतीस उतरला आहे. हा चित्रपट १७ फेब्रुवारी रोजी प्रदर्शित होणार आहे. प्रेक्षक चित्रपटाची आतुरतेने वाट पाहत आहेत.