आईला माहेरी पाठवलं, पोरीचा जीव घेतला, लगेच अंत्यविधी; शुभांगीसोबत त्या रात्री नेमकं काय घडलं?

नांदेड: नांदेड जिल्ह्यात गाजत असलेल्या महिपाल पिंपरी येथील डॉ. शुभांगी हत्या प्रकरणात दररोज नवनवीन खुलासे समोर येत आहेत. या प्रकरणात आता नवीन एक खुलासा समोर आला आहे. दरम्यान, २२ जानेवारी रोजी शुभांगीचे वडील जनार्दन जोगदंड यांनी शुभांगीचा गळा आवळण्यापूर्वी तिच्या आईला मेहुण्याकडे पाठवलं होतं. त्यानंतर सर्वांनी अगोदर दारू प्यायली आणि शुभांगीचा गळा आवळून तिचा खून करण्यात आला.

दरम्यान, तिचा शॉक लागून मृत्यू झाल्याचा बनाव करण्यात आला. तसे शुभांगीच्या आईला सांगण्यात आले आणि आईला थेट शेतात अंत्यसंस्काराच्या वेळीच आणण्यात आले. यावेळी आईला शुभांगीचा चेहरा दाखवण्यात आला. त्यानंतर शुभांगीवर अंत्यसंस्कार करण्यात आले. त्यामुळे मुलीच्या पित्यानेच आपल्या लेकीचा खून केल्याची साधी कुणकुणही तिच्या आईला लागली नाही. या प्रकरणाचे बिंग फुटल्यानंतर शुभांगीच्या आईच्या पायाखालची जमीनच सरकली आहे.

नांदेड पोलीस गेल्या आठवड्याभरापासून या प्रकरणाचा तपास करत आहेत. शुभांगीचे गावातील नात्यात असणाऱ्या मुलाशी असणारे प्रेम प्रकरण कुटुंबीयांना मान्य नव्हते. त्यामुळेच तिची सोयरीक करण्यात आली. पण, शुभंगीच्या प्रियकराने तिची सोयरीक मोडण्यासाठी तिच्या भावी नवऱ्याला फोन करून सांगितले. त्यामुळे शुभांगीची सोयरीक मोडली.

दरम्यान, गावात आपली बदनामी झाल्याचा राग तिचे वडील जनार्दन जोगदंडला आला होता. त्यातूनच शुभांगीचा कायमचा काटा काढण्याचा कट रचण्यात आला. २२ जानेवारी रोजी शुभांगीच्या आईला गावातीलच तिच्या मामाकडे पाठवले. त्यानंतर मध्यरात्री गाव झोपेत असताना शुभांगीचा गळा आवळण्यात आला. यावेळी शुभांगीची आई मामाकडे असल्याने तिला साधी कुणकुणही लागली नाही आणि थेट शेतात नेऊन आईला फक्त शुभांगीचा चेहरा दाखविण्यात आला.

शुभांगीची हत्या केल्यावर काही वेळानंतर माध्यरात्रीलाच आरोपींनी शुभांगीचे प्रेत खताच्या पोत्यात भरुन शेतात नेले. शेतात नेऊन सरणही रचण्यात आले. सरणाला अग्नी देण्यापूर्वी शुभांगीच्या आईला थेट शेतात आणण्यात आले. यावेळी शुभांगीच्या वडिलांनी विजेवरील शेगडी पेटवत असताना शॉक लागून शुभांगीचा मृत्यू झाल्याचे तिच्या आईला सांगितलं. तसेच, अंत्यदर्शन घेण्यासाठी तिच्या आईला फक्त शुभांगीचा चेहरा दाखविला आणि आईला मुलीचे शेवटचे अंत्यदर्शनही पूर्ण होऊ दिले नाही.

शुभांगीवर अंत्यसंस्कार झाल्यानंतर तिची राख आणि हाडे शेतालगत असणाऱ्या कॅनलमध्ये फेकून देण्यात आली. तर अंत्यविधी केल्याच्या ठिकाणी नांगरून घेत, पाणीही सोडण्यात आले. आरोपींनी शुभांगीचा मृतदेह जाळल्यानंतर, गावात चर्चा सुरू झाली होती. मात्र, ही चर्चा शुभांगीच्या आईच्या कानावर पडू नये म्हणून जनार्दन जोगदंड हे पत्नीला घेऊन शेतातच मुक्काम करत होते. दरम्यान, आपल्या लेकीचा पित्यानेच खून केल्याचा साधा संशयही शुभांगीच्या आईला आला नाही.