भगवं वस्त्र, कपाळावर भस्म अन्… शैलेश लोढा यांनी घेतला संन्यास? फोटो पाहून चाहते चकीत

मुंबई- लोकप्रिय मालिका ‘तारक मेहता का उल्टा चश्मा’ या मालिकेतील सर्वाधिक लोकप्रिय कलाकारांपैकी एक असणारे अभिनेते शैलेश लोढा गेले काही दिवस सोशल मीडियावर चर्चत आहे. नुकताच त्यांनी ‘तारक मेहता…’ मालिकेला निरोप दिला. ते मालिकेत तारक हे पात्र साकारत होते. मात्र त्यांच्या जाण्याने प्रेक्षकांना मोठा धक्का बसला. त्यानंतर अनेक गोष्टी बोलल्या गेल्या. अनेक अफवा उडाल्या. त्या किती खोट्या आणि किती खऱ्या हे तर शैलेश आणि निर्माते यांनाच ठाऊक आहे. मात्र अशातच शैलेश यांचा एक फोटो सोशल मीडियावर व्हायरल होत आहे. ज्यात ते भगवी वस्त्र परिधान करून दिसत आहेत. त्यामुळे अनेक नेटकऱ्यांना आश्चर्य वाटलं आहे. अनेक नेटकरी त्यांना कार्यक्रमात परत येण्यासाठी विनवणी करत आहेत.

शैलेश यांचा फोटो पाहून अनेक नेटकऱ्यांनी त्यांनी संन्यास तर घेतला नाही ना, अशी शंका उपस्थित केली आहे. कारण या फोटोमध्ये ते भगवी वस्त्र घालून पूजा करताना दिसत आहेत. त्यांच्या गळ्यात फुलांचा हार आहे. भगवं धोतर, भगवं उपरणं, उजव्या हाताला बांधलेला धागा, कपाळाला भस्म लावून ते मंत्र पठण करताना दिसत आहेत. त्यांनी हा फोटो त्यांच्या इन्स्टाग्राम अकाऊंटवर शेअर केला आहे. हा फोटो शेअर करत त्यांनी लिहिलं, ‘हम को मन की शक्ती देना मन विजय करे.’ त्यांच्या या फोटोवर नेटकरी प्रतिक्रिया देताना दिसत आहेत. कुणी त्यांना कार्यक्रमात परत येण्याची विनंती करत आहे तर कुणी त्यांच्या या संन्यासी अवतारचं कौतुक करत आहेत.

एका चाहत्याने प्रतिक्रिया देत लिहिलं, ‘तुम्ही किती गोष्टींमध्ये अगदी परफेक्ट आहात. तुम्हाला गाणी येतात, शायरी येते, लेखक आहात, अभिनेते आहात.’ दुसऱ्या युझरने लिहिलं, ‘लाख रुपये जरी मिळाले तरी मनात कुठेतरी एक भक्त नक्की असावा.’ आणखी एकाने लिहिलं, ‘सर तुम्ही संन्यास घेत आहात का? कृपया कार्यक्रमात परत या.’ शैलेश यांनी २०२२ मध्ये ‘तारक मेहता…’ कार्यक्रम सोडला होता. नुकतीच निर्मात्यांनी शैलेश यांचे पैसे न दिल्याची चर्चा होती. त्यावर निर्मात्यांनी शैलेश यांनी काही सह्या केल्या नसल्याचं म्हटलं होतं.