अभिनेत्री अलका कुबल यांच्या धाकट्या लेकीनेही केली कमाल; आईने अभिमानाने शेअर केली पोस्ट

अलका यांची मोठी मुलगी ईशानी आठल्ये ही पायलट आहे. तिने वैमानिक होत आपल्या आईवडिलांचं नाव मोठं केलं आहे. तर आता त्यांची छोटी मुलगीही आपल्या मोठ्या बहिणीच्या पावलावर पाऊल ठेवून डॉक्टरकीची परीक्षा उत्तीर्ण झाली आहे. अलका यांची छोटी मुलगी कस्तुरी आठल्ये हिने परदेशी जाऊन डॉक्टरकीचं शिक्षण घेतलं. त्यानंतर डॉक्टरकीची प्रॅक्टिस करण्यासाठी आवश्यक आलेली एफ एम जी इ ही परीक्षा पहिल्याच प्रयत्नात उत्तीर्ण केली. अलका यांनी ही गोष्ट सोशल मीडियावर पोस्ट करत शेअर केली आहे. त्यांनी आपल्या मुलीसाठी एक अभिमानास्पद पोस्ट शेअर केली आहे. या पोस्टमध्ये त्यांनी कस्तुरीचा पदव्युत्तर गणवेशातील फोटो शेअर केला आहे आणि त्यासोबत आपलाही मुलीसोबतचा एक फोटो शेअर केला आहे. हे फोटो शेअर करत त्यांनी लिहिलं, ‘कस्तुरी ने पहिल्याच प्रयत्नात एफ एम जी इ परवाना परीक्षा यशस्वीपणे पास केली. आजपासून डॉक्टर कस्तुरी आठल्ये.’

यासोबतच आम्हाला तुझा खूप खूप अभिमान आहे असं लिहीत आपल्या मुलीला भविष्यासाठी सदिच्छादेखील दिल्या आहेत. त्यांच्या या पोस्टवर अनेक कलाकारांनी कस्तुरीचं अभिनंदन केलं आहे. त्यात कस्तुरीने देखील आपल्या आईने शेअर केलेल्या पोस्टवर तिला धन्यवाद म्हटलं आहे. कस्तूरीवर सध्या शुभेच्छांचा वर्षाव होत आहे.