Tej Police Times
लॉस एंजलिस: संगीत क्षेत्रातील एक मानाचा पुरस्कार म्हणून ‘ग्रॅमी पुरस्कारा’कडे पाहिलं जातं. या पुरस्कारावर नाव कोरण्याचं भल्याभल्यांचं स्वप्न असतं. यावर्षी संगीत विश्वातील हा पुरस्कार सोहळा लॉस एंजलिसमध्ये पार पडला. दरम्यान यंदाही पॉप स्टार बियॉन्सेची जादू सोहळ्यामध्ये दिसली. Beyonce ने यंदा ग्रॅमी पुरस्कार सोहळ्यावर नाव कोरले असून, तिने एक इतिहासही घडवला. त्यामुळे ग्रॅमी पुरस्कारांच्या अविस्मरणीय सोहळ्यात चर्चा झाली ती बियॉन्सेचीच!
यावर्षी ६५ वा ग्रॅमी पुरस्कार सोहळा लॉस एंजलिसमध्ये पार पडला. या कार्यक्रमात बियॉन्सेने तिच्या कारकिर्दीतील ३२ वा ग्रॅमी पुरस्कार जिंकला आणि इतिहास घडला. बियॉन्सेला बेस्ट डान्स/इलेक्ट्रॉनिक म्युझिक अल्बम या कॅटेगरीमध्ये पुरस्कार देण्यात आला आहे. बियॉन्सेच्या या कामगिरीनंतर जगभरातून तिच्यावर कौतुकाचा वर्षाव होतोय.
३२ ग्रॅमी जिंकणारी एकमेव सेलिब्रिटी
३२ वेळा ग्रॅमी पुरस्कार जिंकणारी बियॉन्से एकमेव सेलिब्रिटी आहे. याआधी ३१ वेळा ग्रॅमी पुरस्कार जिंकण्याचा रेकॉर्ड सर जॉर्ज सॉल्टी यांच्या नावावर होता. आता बियॉन्सेने त्यांना मागे टाकत ३२ वेळा हा पुरस्कार जिंकला. या खास प्रसंगी बियॉन्सेने आनंद व्यक्त केला आणि म्हणाली- आई-वडिलांनी मला नेहमीच आयुष्यामध्ये पुढे जाण्यास मदत केली, मी त्यांचे आभार मानते.’ तिने तिच्या तिन्ही मुलांचे आणि नवऱ्याचेही आभार मानले. बियॉन्सेने वयाच्या ४१ व्या वर्षी ही कामगिरी केली असून तिच्या एकूण कारकिर्दीत ८८ नामांकन मिळाली आहेत. यापैकी ३२ वेळा गायिकेने तिचं नाव ग्रॅमी पुरस्कारावर कोरलं.
बियॉन्सेचा लूक
सिल्वर ब्राऊन ड्रेस, हाय हिल्स आणि ब्लॅक ग्लव्ह्ज् अशा क्लासी लूकमध्ये बियॉन्से या सोहळ्यात पोहोचली होती. यावर तिने कुरळ्या केसांची स्टाइल केली होती. बियॉन्सेचा हादेखील लूक विशेष लक्षवेधी ठरला.
भारताच्या रिकी केज यांनी तिसऱ्यांदा जिंकला ग्रॅमी
या पुरस्कार सोहळ्याची प्रतीक्षा जगभरातील संगीतप्रेमींना असते. भारताच्या रिकी केज यांनी तिसऱ्यांदा ग्रॅमी पुरस्कार आपल्या नावे केला असून त्यांना Best Immersive Audio Album कॅटेगरीमध्ये हा पुरस्कार मिळाला. या संगीतकाराने ‘डिव्हाइन टाइड्स’साठी ग्रॅमी आपल्या नावे केला आहे.