महाराष्ट्रात चोरी करून चोर थेट गुवाहाटीला; पोलिसांनी बेड्या ठोकताच आरोपीबद्दल धक्कादायक माहिती उघड

हिंगोली : जिल्ह्यात मागील काही दिवसांपासून चोरट्यांनी चांगलाच धुमाकूळ घातला असून चोरीची आणखी एक घटना उघडकीस आली आहे. हिंगोली येथील खडेश्वर बाबा आश्रमातील पुजाऱ्याच्या डोक्याला पिस्तुल लावत ऐवज लुटणाऱ्या पाच जणांना स्थानिक गुन्हे शाखेच्या पथकाने अटक केली. आरोपींकडून पिस्तुल, जिवंत काडतूस, सोन्याचे दागिणे असा एकूण ३ लाख २४ हजार रूपयांचा मुद्देमाल जप्त केला आहे.

हिंगोली शहराजवळील चिखलवाडी भागातील खडेश्वर बाबा आश्रमातील सुमेरपुरी शंभुपुरी महाराज या पुजाऱ्याच्या डोक्याला पिस्तुल लावून दरोडेखोरांनी सोन्याच्या अंगठ्या, रोख रक्कम असा ऐवज लुटला होता. या घटनेमुळे शहरात भीतीचे वातावरण निर्माण झाले होते. पोलीस अधीक्षक जी. श्रीधर, अप्पर पोलीस अधीक्षक अर्चना पाटील यांनी दरोडेखोरांचा बंदोबस्त करण्याच्या सूचना स्थानिक गुन्हे शाखेला दिल्या होत्या. त्यावरून पोलीस निरीक्षक उदय खंडेराय, सहायक पोलीस निरीक्षक शिवसांब घेवारे, पोलीस अंमलदार संभाजी लेकुळे, भगवान आडे, गजानन पोकळे, ज्ञानेश्वर पायघन, गणेश लेकुळे, प्रशात वाघमारे, शेख जावेद, प्रमोद थोरात, रोहित मुदीराज, दिपक पाटील यांच्या पथकाने तपास सुरू केला होता.

Pune News: भाच्याने मामाच्या मुलीला पळवून नेलं, राग बहिणींवर निघाला, भाचींना भररस्त्यात विवस्त्र करुन मारलं

पोलिसांनी तपास सुरू केल्यानंतर या गुन्ह्यात ओमसाई शिवाजी खरात, प्रदीप उत्तमराव गायकवाड (दोघे रा. गंगानगर हिंगोली), कैलास शिवराम देवकर (रा. गांधीनगर गोरेगाव), अंकुश जालिंदर गायकवाड (रा. इंदिरानगर हिंगोली), राहुल विठ्ठल धनवट (रा. साखरखेर्डा ता. सिंदखेड राजा) यांचा सहभाग असल्याची माहिती पथकाला मिळाली. त्यावरून पथकाने पाचही जणांना ताब्यात घेत विचारपूस केली. तेव्हा या घटनेत सहभाग असल्याचे त्यांनी सांगितले. पोलिसांनी त्यांच्याकडून एक पिस्तुल, तीन जिवंत काडतूस, सोन्याचे दागिणे, दोन दुचाकी, मोबाईल असा एकूण ३ लाख २४ हजारांचा मुद्देमाल जप्त केला.

पुजाऱ्याला लुटल्यानंतर यातील ओमसाई खरात व प्रदीप गायकवाड या दोन आरोपीस एका शेतातून ताब्यात घेतले. तर कैलास देवकर व अंकुश गायकवाड हे दोघे गुवाहटीला पळून गेले होते. तसंच राहुल धनवट हा आरोपी पुण्यात लपून बसला होता. दोघे गुवाहटीला असल्याचे समजल्याने पोलिसांनी त्यांना विश्वासात घेवून विमानाने परत येण्याचे आवाहन केले. त्यानुसार दोघेजण थेट विमानाने नागपूरपर्यंत व पुढे वाहनाने हिंगोलीत परतले.

आरोपीबद्दल धक्कादायक माहिती

या गुन्ह्यातील एका आरोपीची आई सरपंच तर वडील सेवानिवृत्त ग्रामसेवक असल्याचे पोलिसांनी सांगितलं आहे. एक वर्षापूर्वी ओमसाई यास विशाल सांगळे (रा. वंजारवाडा) याने पिस्टल दिले होते.

दरम्यान, स्थानिक गुन्हे शाखेचे स. पो. नि. शिवसांब घेवारे यांच्या पथकाला वर्षभरात तीन दरोडा प्रकरणांचा उलगडा करण्यात यश आलं आहे. या पथकाने सुराणा नगर, बियाणी नगर तसेच उमरा फाटा येथील दरोडा प्रकरणातील आरोपीस जेरबंद केलं आहे.