JEE:‘जेईई’त २० जणांना १०० पर्सेंटाइल गुण

‘एनटीए’ने परिपत्रक प्रसिद्ध करीत निकालाबाबत माहिती दिली आहे. निकालात अभिनित मजेठी, अमोघ जालान, अपूर्व समोटा, अशिक स्टेनी, बिक्किना अभिनव चौधरी, देशंक प्रताप सिंह, ध्रुव जैन, ज्ञानेश शिंदे, दुग्गिनेनी वेंकट युगेश, गुलशन कुमार, कुशल विजयवर्गीय, क्रिश गुप्ता, मयांक सोन, एन. के. विश्वजित, निपुण गोयल, ऋषी कालरा, सोहम दास, हर्षूल संजयभाई सुथार, विविलाला रेड्डी यांनी १०० पर्सेंटाइल गुण मिळवले आहेत.

जेईई मेन्स दोन सत्रांत घेतली जाते. त्यानुसार पहिल्या सत्राची परीक्षा २४ जानेवारी ते एक फेब्रुवारी या कालावधीत झाली. पहिल्या सत्राच्या परीक्षेसाठी एकूण आठ लाख ६० हजार ६४ विद्यार्थ्यांनी नोंदणी केली होती. त्यातील ४६ हजार ४६५ विद्यार्थ्यांनी पेपर दोनसाठी नोंदणी केली होती. त्यापैकी ९५.८ टक्के म्हणजेच आठ लाख २३ हजार ९६७ विद्यार्थ्यांनी ही परीक्षा दिली.

जेईई मेन्सची ही आतापर्यंतची सर्वाधिक उपस्थिती आहे. पहिल्या सत्राच्या परीक्षेसाठी अभियांत्रिकी आणि तंत्रज्ञान प्रवेशासाठी पेपर एक आणि वास्तुकला, नियोजन अभ्यासक्रमांसाठी पेपर दोन असे नियोजन होते. यंदा देशातून परीक्षा दिलेल्या विद्यार्थ्यांपैकी सर्वाधिक विद्यार्थी महाराष्ट्रातील होते. नोंदणी केलेल्या एक लाख सहा हजार १०६ विद्यार्थ्यांमध्ये ७१ हजार १३ मुले, तर ३४ हजार ९३ मुलींचा समावेश होता. आता एप्रिलच्या सत्राची परीक्षेचा निकाल जाहीर झाल्यावर दोन परीक्षांपैकी सर्वोत्तम गुण प्रवेशासाठी ग्राह्य धरले जातील.

जेईई मेन्सची दुसऱ्या सत्राची परीक्षा सहा ते १२ एप्रिल या कालावधीत होणार आहे. त्यासाठीची नोंदणी प्रक्रिया सुरू करण्यात आली. अधिक माहिती https://nta.ac.in/ या वेबसाइटवर देण्यात आली आहे. दरम्यान, यंदा ८९ पेक्षा अधिक पर्सेंटाइल गुण मिळवणारे विद्यार्थी निकालात पात्र ठरल्याचे म्हणता येईल. प्राइम अॅकॅडमीचो १०८ विद्यार्थी जेईई-अॅडव्हान्स्डसाठी पात्र ठरले असून, सहा जणांना ९९ पर्सेंटाइलपेक्षा अधिक गुण आहेत, असे ललित कुमार यांनी सांगितले.

पुण्यातील चौघांना भौतिकशास्त्रात १०० पर्सेंटाइल

जेईई मेन्सच्या निकालात गेल्या चार वर्षांपासून पुणे शहरातील विद्यार्थ्यांकडून सातत्याने चांगली कामगिरी होत आहे. बाकलीवाल ट्युटोरियल्सच्या ओंकार, अनिरुद्ध, अपूर्वा यांनी जेईई मेन्स परीक्षेत चांगली कामगिरी केली आहे. चार विद्यार्थ्यांना भौतिकशास्त्रात १०० पर्सेंटाइल गुण मिळाले आहेत. त्याचप्रमाणे ९५पेक्षा अधिक विद्यार्थ्यांना ९९ पर्सेंटाइलपेक्षा अधिक गुण मिळाल्याचे ट्युटोरियल्स संचालक वैभव बाकलीवाल यांनी सांगितले.