Tej Police Times
पठाण सिनेमाला मिळालेल्या यशाबद्दल, प्रेक्षकांनी दिलेल्या भरभरून प्रतिसादाबद्दल शाहरुख खान भारावून गेला आहे. त्यानं सोशल मीडियावर एक भावुक पोस्ट शेअर करत चाहत्यांचे मनापासून आभार मानले आहेत.
शाहरुख खानची पोस्ट
पठाण सिनेमाला जो उत्स्फूर्त प्रतिसाद मिळाला आहे, ते पाहून शाहरुख खान भारावून गेला आहे. त्यानं सोशल मीडियावर एक पोस्ट शेअर केली आहे. या पोस्टमध्ये शाहरुखन त्याचा एक सेल्फी काढला आहे.त्याच्या पाठीमागे उगवता सूर्य दिसत आहे. उगवत्या सूर्याची किरणं शाहरुखच्या चेहऱ्यावर पडलेली दिसत आहे. हा फोटो शेअर करत शाहरुखनं लिहिलं आहे की, ‘ सूर्य एकच असतो… तो तळपत असतो…आणि अंधारातून तो बाहेर येत पुन्हा प्रकाशमान होतो… पठाणला सूर्यप्रकाश दिल्याबद्दल तुम्हा सर्वांचे मनापासून आभार!’
या सिनेमानं आतापर्यंत ८६५ कोटी रुपयांची घसघशीत कमाई केली आहे. पठाण सिनेमाला जे यश मिळालं त्यामुळे करोनानंतर बॉलिवूडवर आलेली मरगळ दूर झाली आहे.
शाहरुखच्या पोस्टवर नेटकऱ्यांच्या कॉमेन्ट
दरम्यान, शाहरुखनं पोस्ट शेअर केल्यानंतर त्यावर अनेक नेटकऱ्यांनी भरभरून कॉमेन्ट केल्या आहेत. शाहरुखच्या अनेक चाहत्यांनी त्याला सूर्याची उपमा दिली आहे. चाहत्यांबरोबर शाहरुखच्या या पोस्टवर अनेक कलाकारांनीही कॉमेन्ट केल्या आहेत. त्यात अमृता खानविलकर, श्रेया बुगडे, फराह खान यांचाही समावेश आहे.
जगभरातील बॉक्स ऑफिसवर पठाणचा डंका
पठाणची जादू केवळ देशातच नाही तर जगभर पसरली आहे. शाहरुखच्या सिनेमाबाबत चाहत्यांची क्रेझ प्रदर्शनाच्या दुसऱ्या आठवड्यातही पाहायला मिळत आहे. किंग खानचा चित्रपट जगभरातील बॉक्स ऑफिसवर १ हजार कोटींचा आकडा गाठण्याच्या दिशेने वाटचाल करत आहे.
शाहरुख खान जवळपास चार वर्ष मोठ्या पडद्यापासून दूर असला तरी त्याने धमाकेदार वापसी केली आहे. पठाणमुळे अनेक सिंगल थिएटर हाऊसफुल झाले आहेत. पठाणने बॉक्स ऑफिसवर शानदार ओपनिंग करून इतिहास रचला आहे आणि आजही नवनवीन रेकॉर्ड मोडत आहे. दरम्यान, सिनेमात शाहरुखसोबत दीपिका पादुकोण आणि जॉन अब्राहम यांच्याही महत्त्वपूर्ण भूमिका आहेत. अनेक वर्षांनी जॉन नकारात्मक भूमिकेत दिसत आहे.