चित्रपटातून उलगडणार रामदास स्वामींची गाथा; लोकप्रिय अभिनेता साकारणार मुख्य भूमिका

शिवरायांचं वर्णन करताना रामदास स्वामी यांनी निश्चयाचा महामेरु। बहुत जनांसी आधारु।अखंड स्थितीचा निर्धारु । श्रीमंत योगी॥यशवंत कीर्तिवंत। सामर्थ्यवंत वरदवंत नीतिवंत पुण्यवंत। जाणता राजा॥ असं लिहिलं आहे. त्यांनी नेहमीच शिवरायांना योग्य सल्ला दिला. त्यांच्या आयुष्यावर आता सिनेमा येणार आहे. या चित्रपटाचं पहिलं पोस्टर समोर आलं असून ‘रघुवीर’ असं या चित्रपटाचं नाव आहे. समर्थ रामदास नेहमी जय जय रघुवीर समर्थ असं म्हणत, त्यावरूनच हे नाव ठेवण्यात आलं आहे. या चित्रपटात लोकप्रिय अभिनेते विक्रम गायकवाड मुख्य भूमिका साकारत आहेत. त्यांचा समर्थांच्या लूकमधील पहिला पोस्टरही प्रदर्शित करण्यात आला आहे. यात विक्रम ओळखूही येत नाहीयेत. लवकरच हा सिनेमा प्रेक्षकांच्या भेटीला येणार आहे.

विक्रम यांनीही चित्रपटाचा पोस्टर शेअर केलं आहे. हे पोस्टर शेअर करत त्यांनी लिहिलं, ‘भक्ती अन् शक्तीच्या उपासनेचा, विचार अन् आचार स्त्री सन्मानाचा, देण तुझी ही समर्था, तुज चरणी अर्पण, ही ‘रघुवीर’ गाथा.’ त्यांचा हा लूक आता व्हायरल झाला आहे. विक्रम यांनी यापूर्वी अनेक मालिका आणि चित्रपटात काम केलं आहे. त्यांनी ‘उंच माझा झोका’ या मालिकेत साकारलेली गोपाळरावांची भूमिका विशेष गाजली होती. नुकतेच ते ‘अथांग’ वेबसीरिजमध्येही झळकले होते. सध्या ते ‘छोट्या बयोची मोठी स्वप्न’ या मालिकेत दिसत आहेत.