जिंकलंस भावा! मराठमोळ्या अभिनेत्रीच्या बॉयफ्रेंडने केलं असं काही की होतंय तुम्हीही कराल कौतुक

मुंबई– भारत हा सर्वधर्मसमभाव असलेला देश आहे. इथले नागरिक नेहमीच आपल्या धर्मासोबतच इतर धर्मांचादेखील आदर करतात. इथले कलाकारही त्याला अपवाद नाहीत. काही कलाकार तर आपल्या वागण्याने नेहमीच समोरच्याला चकीत करत असतात. आपल्या वागण्याने ते चाहत्यांना नवा आदर्श देत असतात. अशाच एका अभिनेत्याचा व्हिडिओ सध्या सोशल मीडियावर व्हायरल होतोय जो त्याच्या वागणुकीमुळे चाहत्यांच्या कौतुकाला पात्र ठरला आहे. या अभिनेत्याने जे केलंय त्यामुळे त्याने नेटकऱ्यांच्या शाबासकीची थाप मिळवली आहे. हा अभिनेता आहे करण कुंद्रा. लोकप्रिय अभिनेत्री तेजस्वी प्रकाश हीच बॉयफ्रेंड असणारा करणने नेटकऱ्यांची मनं जिंकली आहेत. अजानचा आवाज येताच त्याने पत्रकार परिषद थांबवली. त्यामुळे नेटकरी त्याचं कौतुक करत आहेत.

करणचा व्हिडिओ नेटकऱ्यांमध्ये व्हायरल झाला आहे. त्याने नुकतीच त्याचा नवा कार्यक्रम ‘इश्क में घायल’ साठी आयोजित केलेल्या पत्रकार परिषदेत हजेरी लावली होती. तो मंचावर पत्रकारांच्या प्रश्नांना उत्तरं देत होता. त्यात अचानक तो एकेठिकाणी थांबतो आणि म्हणतो, मला वाटतंय आपण दोन मिनिटं शांत राहूया. तिथे उपस्थित सगळ्यांना तो अजान सुरू असल्याचं सांगतो. दोन मिनिटं शांत राहून तो पुन्हा पत्रकार परिषद सुरू करतो. त्यानंतर पत्रकारही त्याच्या वागण्याचं कौतुक करतात. तुम्ही आमचं मन जिंकलं. खूप खूप धन्यवाद, असं म्हणतात. त्याच्या आगामी कार्यक्रमासाठी शुभेच्छाही देतात. या व्हिडिओवर नेटकरीही त्याचं कौतुक करताना थकत नाहीयेत. चाहते आपल्या प्रतिक्रिया देत आहेत.

एक युझरने लिहिलं, ‘खूप खूप छान. तुम्ही जे केलं त्यासाठी खूप आदर.’ दुसऱ्या युझरने लिहिलं, ‘हे फक्त भारतात पाहायला मिळतं. आम्ही भांडतो पण आम्ही प्रेमही तितकंच करतो.’ आणखी एकाने लिहिलं, ‘मन जिंकलंस भावा.’ एका युझरने लिहिलं, ‘हा आमचा भारत आहे आणि मला भारतीय मुस्लिम असल्याचा अभिमान आहे.’ दुसऱ्या युझरने लिहिलं, ‘आज माझा करणसाठीचा आदर आणखीनच वाढला.’ आणखी एकाने लिहिलं, ‘हिंदू असून मुस्लिम धर्माचा आदर करणं खूप मोठी गोष्ट आहे. त्यासाठी मन साफ लागतं. तुमच्या सगळ्या इच्छा पूर्ण होवोत.’ या व्हिडिओवर अशा अनेक प्रतिक्रियांचा पाऊस पडला आहे.