घरी कोणी नसताना अल्पवयीन मुलीला अश्लील व्हिडीओ दाखवले, शारीरिक संबंध ठेवण्याचाही प्रयत्न

अमरावती:अश्लील व्हिडीओ दाखवून एका अल्पवयीन मुलीचे लैंगिक शोषण करण्यात आल्याची धक्कादायक घटना घडली आहे. तिला जबरदस्तीने सिगारेट आणि दारू पाजण्यात आल्याचीही माहिती आहे. ही धक्कादायक घटना राजापेठ ठाण्याच्या हद्दीत उघडकीस आली. या प्रकरणी दोघांविरुद्ध गुन्हा दाखल करण्यात आला आहे. त्यापैकी एका नराधमाला अटक करण्यात आली आहे.

घरी कोणी नसताना अल्पवयीन मुलीला अश्लील व्हिडीओ दाखवले

शांतनू तायडे (वय-२०) राहणार रवीनगर असे अटक करण्यात आलेल्या आरोपीचे नाव आहे. त्याच्यासह एका अल्पवयीन मुलावर गुन्हा दाखल करण्यात आला आहे. पीडित १७ वर्षीय मुलगी एका महाविद्यालयात शिक्षण घेत असताना तिची ओळख आरोपी अल्पवयीन मुलासोबत झाली. त्यानंतर तो शैक्षणिक कामानिमित्त पीडित मुलीच्या घरी ये-जा करू लागला. या काळात पीडित मुलीच्या घरी कुणी नसताना त्या अल्पवयीन मुलाने अल्पवयीन मुलीला अश्लील व्हिडीओ दाखवत तिच्यासोबत गैरकृत्य केल्याचा आरोप आहे.

निर्जनस्थळी नेऊन अल्पवयीन मुलीसोबत शारीरिक संबंध प्रस्थापित करण्याचा प्रयत्न

एकदाच नाही तर त्याने हा प्रकार पीडित अल्पवयीन मुलीसोबत वारंवार केल्याची माहिती आहे. त्यानंतर एक दिवस तो तिला कॉलेजमधून कोंडेश्वर मार्गावर घेऊन गेला. तिथे एका निर्जनस्थळी त्याने पीडित अल्पवयीन मुलीसोबत शारीरिक संबंध प्रस्थापित करण्याचा प्रयत्न केला. त्यामुळे पीडित मुलीने त्याच्यासोबत बोलणे बंद केले. त्यानंतर अल्पवयीन मुलगा अल्पवयीन मुलीला त्रास देऊ लागला. दरम्यान, याबाबत अल्पवयीन मुलाचा मित्र शांतनू तायडे याला माहिती मिळाली. त्याने त्या आधारावर पीडित अल्पवयीन मुलीला धमकावून तिच्याकडून पैसे उकळले.

अल्पवयीन मुलाच्या मित्राकडूनही पीडितेचं लैंगिक शोषण

इतकंच नाही तर त्याने पीडित अल्पवयीन मुलीला कोंडेश्वर मार्गावरील एका निर्जनस्थळी नेलं, तिथे तिचं लैंगिक शोषणही केले. त्याने तिला धमकावून जबरदस्ती सिगारेट आणि दारूही पाजली. त्यानंतर पीडित अल्पवयीन मुलीने सर्व आपबिती आपल्या कुटुंबीयांना सांगितली. त्यानंतर कुटुंबीयांनी राजापेठ ठाण्यात तक्रार दाखल करण्यात आली आहे. तक्रारीवरून शांतनू तायडे आणि अल्पवयीन मुलाविरुद्ध गुन्हा दाखल करण्यात आला आहे. तर शांतनूला अटक करण्यात आली असून पुढील तपास सुरू आहे.