महाविजय २०२४, भाजपचा संकल्प, फडणवीसांच्या विश्वासू मोहऱ्यावर निवडणुकांची जबाबदारी

नाशिक : आगामी निवडणुकांसाठी भाजपने ‘महाविजय २०२४’ अशा संकल्पाची घोषणा केली आहे. भाजपने लोकसभा आणि विधानसभा निवडणुकांसाठी रणशिंग फुंकले आहे. लोकसभेसाठी ‘मिशन ४५’, तर विधानसभेसाठी ‘मिशन २००’ जाहीर करण्यात आले आहे. विधानपरिषदेचे आमदार श्रीकांत भारतीय हे प्रदेश संयोजक (निवडणूक इन्चार्ज) म्हणून काम पाहणार आहेत. उपमुख्यमंत्री देवेंद्र फडणवीस आणि भाजप प्रदेशाध्यक्ष चंद्रशेखर बावनकुळे यांनी यासंदर्भात घोषणा केली. नाशिकमध्ये भाजपची राज्य कार्यकारिणीची बैठक पार पडली. त्यानंतर देवेंद्र फडणवीस यांनी भाजप नेते आणि पदाधिकाऱ्यांना संबोधित केले.

गेल्या अडीच वर्षात महाविकास आघाडी सरकारमधील नेत्यांनी आपली घरं भरण्याचा प्रयत्न केला. त्यामुळे महाराष्ट्रातील जनतेची अडीच वर्ष वाया गेली. अडीच वर्षात सगळे प्रकल्प ठप्प होते, अख्खं सरकार मला जेलमध्ये पाठवण्यासाठी प्रयत्न करत होतं, मात्र जे मला जेलमध्ये पाठवण्याचे प्रयत्न करत होते, तेच तुरुंगात गेले. मी यांच्या बापालाही घाबरत नाही, असं देवेंद्र फडणवीस यांनी खडसावून सांगितलं.

हे गद्दारांचे नाही, खुद्दारांचे सरकार आहे. जनतेचा विश्वासघात करुन महाविकास आघाडीचं सरकार अस्तित्वात आलं. हे सरकार आपला कार्यकाळ पूर्ण करेच, पण पुन्हा दीडपट संख्या घेऊन परत येऊ. ज्यांना अहंकार होता त्यांना २०१४ मध्ये धडा शिकवला. आम्ही २०-२० ची मॅच सुरु केली आहे, २०२४ ला एकनाथ शिंदे यांच्या नेतृत्वाखाली मॅच जिंकणार. आता फक्त जनतेसाठी काम करायचं, मला काय मिळेल याचा विचार करायचा नाही, असा महत्त्वाचा सल्लाही फडणवीसांनी भाजप नेते-पदाधिकाऱ्यांना दिला.