Tej Police Times
शिक्षिकेची नोकरी मिळविण्यासाठी बनावट कागदपत्रे सादर करून माध्यमिक शिक्षण विभागाची फसवणूक झाल्याचा धक्कादायक प्रकार उघड झाला आहे. राज्यभरात ‘टीईटी’ घोटाळा गाजत असताना नाशिकमध्ये बोगस शिक्षिकेचा हा ‘कारनामा’ उघड झाला आहे. जिल्हा परिषदेच्या तपासणीअंती संशयित शिक्षिका तेजल रवींद्र ठाकरे (वय २६, रा. मालेगाव) यांच्यावर भद्रकाली पोलिसांत ठकबाजीचा गुन्हा दाखल करण्यात आला आहे.
जिल्हा परिषदेच्या माध्यमिक शिक्षण विभागाचे शिक्षणाधिकारी भगवान फुलारी यांनी भद्रकाली पोलिसांत फिर्याद दिली आहे. शिक्षण विभागातर्फे शिक्षिकांच्या कागदपत्रांची पडताळणी सुरू असताना संशयित ठाकरे यांचे ‘टीईटी’ प्रमाणपत्र बनावट असल्याचे उघड झाले. यापूर्वी राज्यात ‘टीईटी’चे बनावट प्रमाणपत्र सादर केल्याप्रकरणी अनेकांवर कारवाई झाली आहे. नाशिक विभागातही यासंदर्भात अनेक तक्रारी पुढे आल्या होत्या. त्यानुसार शिक्षण विभागाने कार्यवाही सुरू केल्यानंतर हा प्रकार समोर आला आहे.
दरम्यान, संशयित शिक्षिका या मालेगावात स्थित एका शिक्षण मंडळाच्या रावळगाव येथील अनुदानित प्राथमिक शाळेत कार्यरत आहेत. त्यांनी सन २०१७ मध्ये शिक्षक सेवक पदावर नोकरी प्राप्त केली. त्यावेळी विविध कागदपत्रांसह त्यांनी ‘टीईटी’ उत्तीर्णतेचे प्रमाणपत्र शासनाला सादर केले. सात वर्षानंतर शिक्षण विभागाच्या तपासणीमध्ये त्यांचे प्रमाणपत्र बोगस असल्याचे स्पष्ट झाले. त्यामुळे शासनाची फसवणूक केल्याप्रकरणी शिक्षणाधिकाऱ्यांनी संशयित शिक्षिकेविरोधात तक्रार देत गुन्हा दाखल केला आहे. याप्रकरणात भद्रकाली पोलिस तपास करीत आहेत.
ठकबाजीची व्याप्ती वाढणार?
पोलिसांच्या तपासामध्ये बनावट प्रमाणपत्र कोणी, कुठे व कसे दिले यासंदर्भात तपास सुरू झाला आहे. त्यामुळे संशयित शिक्षिकेला बनावट प्रमाणपत्र देण्यासाठी मदत केलेल्या अनेकांचे धाबे दणाणले आहे. काही संशयित शिक्षण विभागाशी संलग्नित अथवा तिथे कार्यरत असण्याची शक्यता नाकारता येत नाही. त्यामुळे शिक्षिकेच्या जबाबानुसार पोलिसांच्या कारवाईची दिशा ठरणार आहे. मात्र, याप्रकरणात अनेक मोठे मासे गळाला लागण्यासह ठकबाजीची व्याप्ती वाढण्याचा पोलिसांचा अंदाज आहे.