MU Result: मुंबई विद्यापीठाकडून ३० दिवसांत २५ परीक्षांचे निकाल

यामध्ये काही निकाल तर तब्बल १५० दिवसांनी लावून विद्यापीठाने एक नवीन विक्रम आपल्या नावे केला आहे. अद्यापही हिवाळी सत्राच्या काही परीक्षांचे निकाल लागणे बाकी आहे. विद्यापीठाकडून निकालांना सातत्याने होणाऱ्या विलंबाचा त्रास विद्यार्थ्यांना सहन करावा लागत आहे. परिणामी विद्यापीठाला मोठ्या प्रमाणावर टीकेला सामोरे जावे लागत आहे.

दरम्यान सहाव्या सत्रानंतर बहुतांश विद्यार्थी उच्च शिक्षणासाठी परदेशात अथवा देशातील अन्य विद्यापीठांमध्ये प्रवेश घेतात. सहाव्या सत्राचा निकाल वेळेत न लागल्यास या विद्यार्थ्यांना प्रवेश घेताना अडचणी उद्भवू शकतात. त्यामुळे आता सहाव्या सत्राचे निकाल वेळेत लावण्यावर विद्यापीठ प्रशासनाने भर दिला आहे.

प्रमुख कॉलेजचे प्राचार्य, महाविद्यालयातील प्राध्यापक आणि विद्यापीठातील प्राध्यापक यांना मूल्यांकन वेळेत पूर्ण करण्याचे निर्देश विद्यापीठाने दिले आहेत. सुट्टीच्या काळात देखील मूल्यांकन करण्यास विद्यापीठाने प्राध्यापकांना बजावले आहे. त्यामुळेच गेल्या काही दिवसात उन्हाळी सत्राचे २५ निकाल ३० दिवसाच्या आत जाहीर केले आहेत, असे अधिकाऱ्यांनी नमूद केले.

विद्यापीठाने उन्हाळी सत्रातील द्वितीय वर्ष व अंतिम वर्ष फाईन आर्टच्या स्कल्पचर, मेटल वर्क आणि सिरॅमिक्स या अभ्यासक्रमांसह मास्टर ऑफ लायब्ररी सायन्स सत्र १, २, ३ आणि ४, मास्टर ऑफ फाइन आर्ट इंटिरिअर डेकोरेशन भाग १, मास्टर ऑफ फाइन आर्ट स्कल्पचर भाग १, मास्टर ऑफ फाइन आर्ट मेटल वर्क भाग १ असे १३ निकाल एका दिवसात जाहीर केले आहेत.

कुलगुरु परीक्षा विभागात

राज्यपाल रमेश बैस यांनी कानउघाडणी केल्यावर विद्यापीठाने कारभार सुधारण्यावर भर दिला आहे. विद्यापीठाचे प्रभारी कुलगुरु डॉ. डी. टी. शिर्के हे मागील एक महिन्यापासून विद्यानगरी येथील परीक्षा विभागात प्रत्यक्ष बसून निकालाच्या कामकाजावर लक्ष ठेवून आहेत. दैनंदिन बैठका घेऊन विविध शाखांचे अधिष्ठाता, विविध परीक्षा विभागातील अधिकारी, सीसीएफमधील अधिकारी आणि कर्मचारी वर्ग यांना उन्हाळी सत्राच्या निकालाचे नियोजन करण्याचे निर्देश दिले आहेत, असेही अधिकाऱ्यांनी सांगितले.