इमर्जन्सी, अॅनिमल आणि बऱ्याच बॉलिवूड सिनेमांचं प्रदर्शन लांबणीवर,समोर आलं खरं कारण

आगामी ‘अॅनिमल’ हा चित्रपट ऑगस्ट महिन्यात प्रदर्शित होणार होता. रणबीर कपूर अभिनित या सिनेमाची पहिली झलक प्रेक्षकांसमोर आल्यानंतर त्याविषयी आणखी चर्चा होऊ लागली. ऑगस्ट महिन्यात या चित्रपटाची टक्कर सनी देओलच्या ‘गदर २’ आणि अक्षयकुमारच्या ‘ओएमजी २’बरोबर होणार असल्याचं चित्र होतं. मात्र, आता संदीप वांगा रेड्डी दिग्दर्शित या सिनेमाच्या प्रदर्शनाची तारीख डिसेंबरपर्यंत पुढं ढकलण्यात आलीय. व्हीएफएक्सचं काम पूर्ण झालं नसल्यामुळे या चित्रपटाचं प्रदर्शन पुढं ढकललं असल्याची चर्चा आहे. सिनेमाच्या पोस्ट प्रोडक्शनचं काम पूर्ण करण्यासाठी दिग्दर्शकाला अधिक वेळ हवा आहे. दिग्दर्शक संदीप व्हीएफएक्समध्ये तडजोड करू इच्छित नाही. यासाठी चित्रपट प्रदर्शित होण्यास उशीर होत आहे. रणबीरच्या या चित्रपटातला अ‍ॅक्शन सिक्वेन्स भव्य असल्याचं सांगण्यात येतंय. रणबीरचा ‘अँग्री मॅन’चा अवतारही प्रेक्षकांना आवडला आहे. एक डिसेंबर २०२३ अशी या चित्रपटाच्या प्रदर्शनाची नवी तारीख आहे.

सिनेमे प्रदर्शनाच्या प्रतीक्षेत
शाहरुख खानचा ‘पठाण’ हा चित्रपट यंदाच्या ब्लॉकबस्टर चित्रपटांत दाखल झालेला असला, तरी त्यातली अनेक व्हीएफएक्स हास्यास्पद होती. हे लक्षात घेत आता शाहरुखच्या ‘जवान’ आणि ‘डंकी’ या दोन्ही सिनेमांच्या टीम त्याच्या व्हीएफएक्सवर अधिक बारकाईनं काम करत आहेत. तीच गोष्ट कंगना रणोटच्या ‘इमर्जन्सी’ या सिनेमाची. या सिनेमात आणीबाणीच्या काळात घडलेल्या घटना दाखवण्यात येणार आहेत. कंगना यात माजी पंतप्रधान इंदिरा गांधी यांची भूमिका साकारणार आहे. यासह ती ‘तेजस’, ‘चंद्रमुखी’ आणि एका ऐतिहासिक सिनेमाचं काम करतेय. या तिन्ही चित्रपटांसाठी तिनं हॉलिवूडमधल्या तंत्रज्ञांचीही मदत घेतली असल्याचं कळतंय. आपल्या कलाकृतीची खिल्ली उडवली जाऊ नये, हा त्यामागचा हेतू आहे. आगामी काळात अनेक विविधांगी विषय असलेले सिनेमेही येत आहेत. सिद्धार्थ मल्होत्राचा ‘योद्धा’, टायगर श्रॉफचा ‘गणपथ’, विकी कौशलचा ‘सॅम बहादूर’ हे हिंदी चित्रपट येणार आहेत. तसंच सध्या हॉलिवूड अभिनेता टॉम क्रूझच्या ‘मिशन इम्पॉसिबल : डेड रेकनिंग’ या चित्रपटाची जोरदार चर्चा आहे. ‘इंडियाना जोन्स अँड डायल ऑफ डेस्टिनी’ नुकताच प्रेक्षकांसमोर आला. त्यातला दुसऱ्या महायुद्धाचा कालखंड जमून आल्यानं प्रेक्षक त्याचं कौतुक करत आहेत. म्हणूनच आगामी काळात हिंदी चित्रपटांसमोर व्हीएफएक्स व तंत्रज्ञानाचं आव्हान कायम असणार आहे. यात बॉलिवूडवाले कितपत यशस्वी ठरत आहेत; हे येणारी वेळच सांगेल.