स्मार्टवॉचची जागा आता स्मार्ट रिंग घेणार, boAt कंपनीची ही रिंग घेईल तुमच्या हृदयाची खास काळजी

नवी दिल्ली : boAt Launching Smart Ring in India : तंत्रज्ञानाच्या जगात इतकी प्रगती झाली आहे की कधीकाळी अशक्य वाटणाऱ्या गोष्टीही आज शक्य होत आहेत. जिथे आधी आपण आरोग्याशी संबंधित कोणत्याही समस्येसाठी प्रथम डॉक्टरांकडे धाव घ्यायचो, परंतु आता स्मार्टवॉचने आरोग्याशी संबंधित बऱ्याच गोष्टींवर लक्ष ठेवण्याचा त्रास दूर केला आहे. हार्ट रेट मोजण्यापासून ते तापापर्यंत अनेक गोष्टी स्मार्टवॉचच्या माध्यमातून करता येतात. आता या हेल्थ रिलेटेड डिव्हाईसेसमध्ये आणखी एक डिव्हाईस अॅड होणार असून लवकरच बोट कंपनी आपली पहिली वहिली स्मार्ट रिंग लाँच करत आहे. ज्याद्वारे तुम्हाला तुमच्या हार्ट रेटसह, शरीराचे तापमान यासह इतर हेल्थ ट्रॅकर्स सहज उपलब्ध होतील. म्हणजेच, तुम्हाला फक्त तुमच्या बोटात ही अंगठी घालावी लागेल आणि तुम्ही तुमच्या आरोग्याचा मागोवा ठेवू शकाल. boAt स्मार्ट रिंगमध्ये काय विशेष दिले जाऊ शकते ते जाणून घेऊया.

boAt स्मार्ट रिंगमध्ये असणार हे फीचर्स
boAt स्मार्ट रिंग सिरॅमिक आणि धातूपासून बनविली जाईल. तिची रचना अगदी आकर्षक असेल. कोणत्याही ड्रेसिंगवर सूट होणारी अशीच ही स्मार्ट रिंग असेल. याला 5ATM रेटिंग असेल ज्यासह ते पाणी आणि घामाने खराब होणार नाही. तसंच याची बिल्ड क्वॉलिटी अगदी कॉम्पॅक्ट आणि हलकी असेल. यामध्ये आरोग्य आणि फिटनेस ट्रॅकिंग संबधित दमदार फीचर्स असतील. या स्मार्ट रिंगसह, तुम्ही पावले, अंतर चालणे, बर्न झालेल्या कॅलरी अशा बऱ्याच गोष्टी ट्रॅक करु शकता. या स्मार्ट रिंगद्वारे तुम्ही हार्टरेट मोजू शकाल. या व्यतिरिक्त, तुम्ही शरीराच्या तापमानासह SpO2 म्हणजेच ब्लड ऑक्सिजन लेव्हलही मोजू शकाल.

ही स्मार्ट रिंग स्लीप मॉनिटरिंग फीचर्ससह देखील येईल. याद्वारे तुम्ही तुमचा झोपेचा पॅटर्न, झोपेचा एकूण कालावधी यासारख्या गोष्टी तपासू शकाल. याच्या मदतीने तुम्ही तुमची झोप आणखी सुधारू शकता. यात मासिक पाळी ट्रॅकर देखील असेल ज्यामुळे महिलांना खूप फायदा होईल.

वाचा : काय सांगता? सर्वात जुना iPhone तब्बल १.३ कोटींना विकला गेला, पाहा या फोनमध्ये काय आहे खास?