ओळखीच्या व्यक्तीनेच ३५ वर्षीय तरुणाची गळा चिरून केली हत्या

जळगाव : पैशांच्या वादातून एका ३५ वर्षीय तरुणाची धारदार शस्त्राने गळा चिरून हत्या करण्यात आली आहे. ही धक्कादायक घटना जिल्ह्यातील अमळनेर शहरात आज शुक्रवारी सकाळी समोर आली. या घटनेमुळे अमळनेर तालुक्यात खळबळ उडाली आहे. प्रकाश दत्तू चौधरी (वय ३५ रा. गांधलीपुरा, अमळनेर ) असं हत्या झालेल्या तरुणाचं नाव आहे.

अमळनेर शहरातील नगरपालिकेच्या हाशिमजी प्रेमजी व्यापारी संकुलात आज सकाळी नेहमीप्रमाणे नगरपालिकेचे सफाई कर्मचारी साफसफाई करण्यासाठी गेले होते. त्यावेळी त्यांना एक तरुण रक्ताच्या थारोळ्यात पडलेला दिसला. यानंतर घटनास्थळी नागरिकांची मोठी गर्दी झाली. या घटनेची माहिती पोलिसांना देण्यात आली. पोलीस तातडीने घटनास्थळी दाखल झाले. पोलिसांनी प्राथमिक चौकशीत मयत तरुणाची ओळख पटवली. तो गांधलीपुरा भागातील रहिवासी असलेला प्रकाश चौधरी असल्याचं स्पष्ट झालं. त्यानंतर त्याच्या कुटुंबियांना पोलिसांनी घटनेची माहिती दिली.

अण्णा हजारे म्हणतात, जनता कुंभकर्णासारखी झोपलीय, मी एकटा काय करू?

घटनेचे वृत्त कळताच पोलीस निरीक्षक जयपाल हिरे यांच्या मार्गदर्शनाखाली एपीआय राकेशसिंग परदेशी, हेड कॉन्स्टेबल सुनील हटकर यांनी घटनास्थळी भेट देऊन पंचनामा केला. नंतर पोलिसांनी तातडीने तपासाची सूत्रे हलवली. त्यात प्रकाश चौधरी याची हत्या पैशांच्या वादातून झाल्याची प्राथमिक माहिती समोर येत आहे.

प्रकाशची हत्या कैलास पांडुरंग शिंगाणे नामक व्यक्तीने केल्याचा संशय आहे. संशयित आरोपी कैलास हा फरार झाला असून त्याचा शोध सुरु असल्याची माहिती पोलिसांनी दिली आहे.

दरम्यान, या घटनेनं शहरात एकच खळबळ उडाली असून नागरिकांमध्ये भीतीचं वातावरण निर्माण झालं आहे.