Tej Police Times
अहमदनगर: राज्याचे माजी गृहमंत्री व राष्ट्रवादी काँग्रेसचे नेते अनिल देशमुख (Anil Deshmukh) यांना ‘क्लीनचिट’ देण्यात आली असल्याचा दावा करणारी कागदपत्रे व्हायरल झाली आहेत. याला अद्याप अधिकृत दुजोरा मिळालेला नाही. मात्र, यावर आता राष्ट्रवादी काँग्रेसकडून प्रतिक्रिया आली आहे. ‘सत्तेसाठी असत्याचा कितीही गोंगाट केला तरी सत्य हे कधीच झाकलं जात नाही, हे पुन्हा एकदा सिद्ध झालं,’ अशा शब्दांत राष्ट्रवादी काँग्रेसचे आमदार रोहित पवार (Rohit Pawar)यांनी यावर प्रतिक्रिया व्यक्त केली आहे.
वाचाः अनिल देशमुख यांना सीबीआयकडून क्लीन चीट?
या कथित अहवालामुळं राजकीय क्षेत्रात विविध चर्चा सुरू झालेल्या आहेत. राष्ट्रवादीचे आमदार रोहित पवार यांनी यासंबंधी एक ट्विट केलं आहे. त्यासोबत त्यांनी आपल्या एका जुन्या ट्विटचाही संदर्भ दिला आहे. पवार यांनी म्हटलं आहे, ‘सत्तेसाठी असत्याचा कितीही गोंगाट केला तरी सत्य हे कधीच झाकलं जात नाही, हे पुन्हा एकदा सिद्ध झालं. यातून सत्तेसाठी हपापलेल्या भाजपची अस्वस्थता अजून वाढणार असल्याने त्यांना मनःशांती लाभो आणि खोटारडेपणा करुन राज्याला बदनाम आणि अशांत न करण्याची सद्बुद्धी मिळो, अशी मी प्रार्थना करतो.’ असं पवार यांनी म्हटलं आहे.
यासोबत त्यांनी एका जुन्या ट्विटचा संदर्भ दिला आहे. देशमुख यांच्यासंबंधी दाखल एका याचिकेत कोर्टाचा आदेश आल्यानंतर त्यांनी गृहमंत्रीपदाचा राजीनामा दिला होता. त्यावेळी रोहित पवार यांनी ट्विट करून म्हटलं होतं, ‘करोनाच्या संकटात गृहमंत्री म्हणून पोलीस दलाचं मनोधैर्य वाढवण्याचं अत्यंत महत्त्वाचं काम आपण केलंत. पण आज माननीय उच्च न्यायालयाच्या निर्णयाचा मान राखत आपण राजीनामा दिला. वास्तविक आपल्यावरील आरोप हे एक राजकीय षडयंत्र असून या अग्निदिव्यातून आपण यशस्वीपणे बाहेर पडाल, असा विश्वास आहे.’ असं त्यावेळी पवार यांनी म्हटलं होतं. आता यासंबंधीचा कथित अहवाल व्हायरल झाल्यावर पवार यांनी या जुन्या ट्विटचा संदर्भ देत नवीन ट्विटही केलं आहे. त्यामुळं या अहवालाच्या खरेपणाबद्दल पुन्हा राजकीय वर्तुळात चर्चा सुरू झाली आहे.
वाचाः गणेशोत्सवासाठी कोकणात गावी जाताय?; ‘हे’ नियम बंधनकारक