करोना रुग्णांमध्ये वाढ, नवा प्रकार कसा आहे, किती घातक आहे, जाणून घ्या तुमच्या सर्व प्रश्नांची उत्तरं

राज्यातील साप्ताहिक करोनारुग्ण

२८ ते ४ डिसेंबर- १४

५ ते ११ डिसेंबर- २२

१२ ते १८ डिसेंबर- २५

१९ ते २५ डिसेंबर- १६८

सोसायटीतील फ्लॅटमध्ये दहशतवादी, पोलिसांना फोन, इमारतीखाली मोठा फौजफाटा अन् मग…
करोना विषाणूच्या बदलत्या उपप्रकाराचा (जेएन-१) संसर्ग वाढत आहे. त्यामुळे करोनाच्या या उपप्रकाराचा संसर्ग काळजी करण्यासारखा आहे का, असा प्रश्न सामान्यांच्या मनामध्ये उपस्थित होत आहे. करोना विषाणूच्या या प्रकारामध्ये नैसर्गिकरीत्या जनुकीय बदल होतात. या बदलांमुळे हा विषाणू अधिक सहज पसरतो. त्यामुळे होणारा संसर्ग हा सौम्य स्वरूपाचा असेल, असे संसर्गजन्य आजाराच्या तज्ज्ञांनी म्हटले आहे. भारतामध्ये मोठ्या संख्येने लसीकरण झाल्यामुळे करोना संसर्गाची अधिक धास्ती घेऊ नये, असेही तज्ज्ञांनी म्हटले आहे.

…असा आहे विषाणू

‘जेएन-१’ हा करोना विषाणूचा उपप्रकार त्याच्या आधीच्या बीए २.८६ या ओमायक्रॉन प्रकारापासून तयार झालेला आहे. त्याचे जनुकीय स्वरूप बीए.२.८६.१.१. असे आहे. भारतात बीए.२.८६ चा शिरकाव डिसेंबर २०२१मध्ये झाला. त्यानंतर बरेच दिवस अनेकांमध्ये सौम्य लक्षणे असलेला आजार पसरला. त्याचवेळी आपल्याकडे कोव्हिशील्ड आणि कोव्हॅक्सिनचे लसीकरण वेगाने केले गेले. जेएन-१ हे बीए.२.८६चे नवीन जनुकीय बदल झालेले स्वरूप असल्याचे नायर रुग्णालयाचे निवृत्त प्राध्यापक, सूक्ष्मजीव विभागाच्या डॉ. माधव साठे यांनी सांगितले.

…अशी आहेत लक्षणे

ताप, खोकला, घशात खवखव, नाक चोंदणे, अंगदुखी, डोकेदुखी, अशक्तपणा, श्वास घ्यायला त्रास होणे ही लक्षणे या तापामध्ये दिसतात. जेएन-१ या प्रकाराचा करोना विषाणू सहज पसरू शकतो. त्याची संसर्गक्षमता अधिक असावी. सध्या भारतामधील करोनारुग्णांचे प्रमाण साधारण ३ ते ४ टक्के आहे. अमेरिकेत जे करोनाबाधित रुग्ण आहेत, त्यांच्यामध्ये जेएन-१चे प्रमाण ४० ते ४४ टक्के आहे. विदेशामध्ये कडक थंडी सुरू झाली आहे. हे वातावरण विषाणूजन्य आजारासाठी अनुकूल आहे. मात्र, आपल्याकडे रोगप्रतिकारशक्ती आणि लसीकरणाच्या एकत्रित परिणामामुळे श्वसनविकारांची तीव्रता वाढणार नाही, याकडे तज्ज्ञांनी लक्ष वेधले आहे.

लस घ्या, सुरक्षित राहा

लसीकरण पूर्ण झालेल्या व्यक्तींना हा आजार होण्याची शक्यता अत्यंत कमी आहे. लसीकरण आणि भारतात येऊन गेलेल्या ओमायक्रॉनच्या लाटेमुळे यावेळी संसर्ग अधिक प्रमाणात होणार नाही. ओमायक्रॉन आणि जेएन-१चे जनुकीय साधर्म्य लाभदायक ठरणार आहे. त्यामुळे लस घ्या, सुरक्षित राहा, असा सल्ला तज्ज्ञांनी दिला आहे.

काय काळजी घ्यावी?

-गंभीर आजार असलेल्यांनी गर्दीत जाणे टाळावे किंवा मास्क लावूनच बाहेर पडावे.

-श्वसनाच्या आजाराची तीव्रता वाढती असेल तर रुग्णालयामध्ये दाखल व्हावे.

-ताप; तसेच इतर लक्षणांची तीव्रता कमी होत नसेल तर तातडीने चाचण्या करून घ्याव्यात.

-घरगुती उपचार करू नयेत; तसेच आजार अंगावर काढू नये.

-एखाद्या व्यक्तीला करोनाची बाधा झाली असेल तर त्याच्याशी संपर्क टाळावा.

विना पॅराशूट १०,००० फुटांवरुन उडी, मग स्वत:च्याच मृत्यूचा व्हिडिओ रेकॉर्ड केला अन्…
Read Latest Maharashtra News And Marathi News