महापालिका शिक्षक सर्वेक्षणात अन् शाळा वाऱ्यावर; शिक्षकांसह मुख्याध्यापकांवरही जबाबदारी

पिंपरी-चिंचवड महापालिकेतील ७,५०० कर्मचाऱ्यांपैकी १,९०० कर्मचाऱ्यांना सर्वेक्षणाचे काम दिले आहे. यात एक हजार २३ शिक्षकांना सर्वेक्षणाची जबाबदारी दिली आहे. यात बाकी कर्मचाऱ्यांचा विचार न करता शिक्षकांना थेट कामे दिली असल्याने शिक्षकांचा अतिरिक्त ताण वाढला आहे. सर्वेक्षणानंतर पुन्हा राहिलेला अभ्यासक्रम पूर्ण करण्याची जबाबदारी शिक्षकांना चुकणार नाही. त्यातच शाळेची गुणवत्तावाढ होण्याची टांगती तलवार आहेच. त्यामुळे उपक्रमांच्या रगाड्यात विद्यार्थ्यांना शिकवणार कधी, असा कुजबुजता सवाल शिक्षक करीत आहेत.

शिक्षकच का?

शिक्षकांवर विद्यार्थ्यांची मोठी जबाबदारी असताना शिक्षकांना अशी अशैक्षणिक कामांची जबाबदारी देणे कितपत योग्य आहे? त्यामुळे आमच्यावर अतिरिक्त ताण येऊन विद्यार्थ्यांचे शैक्षणिक नुकसान होते, याला जबाबदार कोण, असा सवाल शिक्षक विचारत आहेत. याबाबत अधिकाऱ्यांनी आम्हाला ‘शाळा बंद राहिल्या तरी चालतील, आधी सर्वेक्षण करा,’ असे तोंडी आदेश दिल्याचे एका शिक्षकाने खासगीत सांगितले.

शिक्षकांसह मुख्याध्यापकांनाही जबाबदारी

शिक्षकांसह मुख्याध्यापकांनाही ही जबाबदारी दिली आहे. त्यामुळे केवळ मानधनावरील शिक्षकांवर शाळेची जबाबदारी आली आहे. शिक्षणाव्यतिरिक्त शिक्षकांना नेहमीच काही ना काही अशैक्षणिक कामांची जबाबदारी येते. आता एकेका शिक्षकाला कमीत कमी ३०० ते ४०० घरांत सर्वेक्षण करावे लागत आहे. त्यामुळे येत्या सहा दिवसांत ४०० घरांना भेटून सर्वेक्षण पूर्ण करावयाचे आहे.
मराठा व खुल्या वर्गाचे आरक्षण सर्व्हेक्षण वादात सापडले; पहिली उत्तीर्ण बिगाऱ्याला मराठा सर्वेक्षणाचे काम
शिक्षण विभागात शांतता

नेहमीच शिक्षक, कर्मचारी अधिकारी यांची गडबड शिक्षण विभागात पाहायला मिळते. मात्र, सध्या शिक्षण विभागात अगदी शुकशुकाट होता. सर्वच कर्मचाऱ्यांना सर्वेक्षणाची जबाबदारी दिल्याने विभागात कमालीची शांतता पाहायला मिळाली.

काहीच दिवसांत हे काम पूर्ण करण्याची जबाबदारी असल्याने महापालिकेच्या सर्वच विभागांतील कर्मचाऱ्यांना हे काम दिले आहे. त्यात शिक्षकही आहेत; तरीही आम्हाला मनुष्यबळ कमी आणि काम अधिक अशी परिस्थिती आहे.- अविनाश शिंदे, सहायक आयुक्त, नोडल ऑफिसर