‘हा’ आहे जगातील सर्वात बेस्ट डिस्प्ले असलेला फोन; iPhone आणि Galaxy S24 Ultra ला देखील टाकले मागे

चिनी स्मार्टफोन निर्माता कंपनी Honor नं अलीकडेच आपला Magic 6 Pro स्मार्टफोन जागतिक बाजारात लाँच केला आहे. त्यानंतर लगेचच DxOMark या रेटिंग वेबसाइटनं या डिवाइसचं अ‍ॅनालिसिस प्रकाशित केलं आहे. यातून धक्कादायक परिणाम समोर आले आहेत. DxOMark च्या रँकिंगनुसार Magic 6 Pro मध्ये ६.८ इंचाचा जबरदस्त AMOLED डिस्प्ले आहे, ज्याने पहिला क्रमांक मिळवला आहे. ज्याने Samsung Galaxy S24 Ultra ला मागे टाकलं आहे.

वेबसाइटच्या टेस्टिंगमध्ये Honor Magic 6 Pro च्या डिस्प्लेला १५७ पॉईंट्स मिळाले आहेत. गॅलेक्सी एस२४ अल्ट्रा पेक्षा २ तर पिक्सल ८ प्रो पेक्षा तीन पॉईंट्स जास्त आहेत. या रँकिंगमध्ये आयफोन १५ प्रो मॅक्स १४९ पॉईंट्ससह १० व्या क्रमांकावर आहे.
हे देखील वाचा: तिला नाही समजली म्हणून काय झालं ‘या’ फोनला समजेल तुमच्या नजरेची भाषा; आय ट्रॅकिंगसह Honor Magic 6 Pro लाँच

Honor Magic 6 Pro चे स्पेसिफिकेशन्स

Honor Magic 6 Pro अँड्रॉइड १४ आधारित मॅजिक ओएस ८ आहे. हा फोन स्नॅपड्रॅगन ८ जेन ३ चिपसेटवर चालतो. कंपनीनं यात १६जीबी पर्यंत रॅम आणि १टीबी पर्यंतची स्टोरेज दिली आहे. फोनमध्ये ६.८ इंचाचा फुलएचडी+ एलटीपीओ अ‍ॅमोलेड डिस्प्ले मिळतो, जो १२० हर्ट्झ रिफ्रेश रेटला सपोर्ट करतो. कंपनीनं यात ५,६०० एमएएचची मोठी बॅटरी दिली आहे जी ८० वॉट फास्ट चार्जिंगला सपोर्ट करते. ऑनर मॅजिक ६ प्रो मध्ये आयपी६८ रेटिंग देण्यात आली आहे.

फोनमध्ये ट्रिपल रियर कॅमेरा सेटअप मिळतो. ज्यात ५० मेगापिक्सलचा मुख्य कॅमेरा ओआयएस सपोर्टसह येतो. सोबत ५० मेगापिक्सलचा अल्ट्रा वाइड कॅमेरा आणि १८० मेगापिक्सलचा पेरिस्कोप टेलीफोटो कॅमेरा आहे जो ओआयएस आणि २.५एक्स ऑप्टिकल झूमला सपोर्ट करतो. तर फ्रंटला ५०मेगापिक्सलचा सेल्फी कॅमेरा देण्यात आला आहे.

Honor Magic 6 Pro मधील एआय फिचरवर कंपनीनं सर्वाधिक भर दिला आहे. ऑनर म्हटलं आहे की गेल्यावर्षी कंपनीनं टीज केलेलं एआय आधारित आय ट्रॅकिंग फिचर लवकरच फोनमध्ये येईल. कंपनीनं दावा केला आहे की हे फिचर तुमची नजर नोटिफिकेशन बारवर आहे की नाही ते ओळखेल आणि संबंधित अ‍ॅप ओपन करेल, यासाठी तुम्हाला तुमचे हात वापरण्याची गरज नाही.

Honor Magic 6 Pro ची किंमत

Honor Magic 6 Pro स्मार्टफोन १२जीबी रॅम व ५१२जीबी स्टोरेजसह येतो, ज्याची किंमत १,२९९ युरो ठेवण्यात आली आहे, ही किंमत १,१६,६०० भारतीय रुपयांमध्ये रूपांतरित होते. हा फोन १ मार्च पासून विकला जाईल.