Shaitaan Box Office: बॉक्स ऑफिसवर ‘शैतान’चं वादळ; पाच दिवसात बजेटचे पैसे वसूल, किती केली कमाई?

मुंबई– लोकप्रिय अभिनेता अजय देवगन, ज्योतिका आणि आर माधवन यांचा हॉरर थ्रिलर चित्रपट ‘शैतान’ने प्रदर्शित होण्यापूर्वीच सगळ्यांचं लक्ष वेधून घेतलं होतं प्रदर्शनानंतररही हा चित्रपट प्रेक्षकांची मनं जिंकताना दिसतोय. ‘आर्टिकल ३७०’, ‘लापता लेडीज’ सारखे चित्रपट आधीच बॉक्स ऑफिसवर असताना ‘शैतान’ ने चित्रपटगृहांमध्ये आपला दबदबा बनवला आहे. या चित्रपटाला प्रेक्षकांचा चांगलाच प्रतिसाद मिळताना दिसत आहे. या चित्रपटाची चांगलीच माऊथ पब्लिसिटी होत आहे. प्रदर्शनाच्या पाच दिवसातच या चित्रपटाने आपल्या बजेटपेक्षा जास्तीची कमाई केली आहे. पाहूया या चित्रपटाने नेमकी किती कमाई केली आहे.

या चित्रपटासाठी माधवनचं कौतुक होताना दिसत आहे. कारण तो पहिल्यांदाच नकारात्मक भूमिकेत तेही हॉरर चित्रपटात दिसत आहे. माधवनचा हा अंदाज त्याचे चाहते मुळीच मिस करू इच्छित नाहीत. तर अजय यापूर्वी ‘दृश्यम’ आणि ‘दृश्यम २’ मधून प्रेक्षकांची मनं जिंकताना दिसला होता. आता या चित्रपटातही तो अशाच एका वडिलांच्या भूमिकेत आहे पण त्याच्या घरात आलेलं हे वादळ इतर गोष्टींपेक्षा जरा जास्त भयानक आहे. ‘वश’ या चित्रपटावर आधारित ‘शैतान’ने पहिल्याच दिवशी चांगली आगाऊ बुकिंग करून १४. ७५ कोटी रुपयांची कमाई केली. सोबतच हा चित्रपट या वर्षातील सगळ्यात चांगल्या ओपनिंगसह बॉलिवूड चित्रपटांमध्ये अव्वल स्थानावर पोहोचला.

या चित्रपटाने शनिवारी १८. ७५ कोटी आणि रविवारी २०. ०५ कोटींची कमाई केली. या चित्रपटाने पहिल्या सोमवारीही ७. २५ कोटींचा गल्ला जमवला. सोमवारपासून इतर चित्रपटांची स्थिती वाईट झाली असली तरी इतर चित्रपटांच्या तुलनेत मंगळवारीही या चित्रपटाने जवळपास ६. ७५ कोटी इतकी कमाई केली. एकूण या चित्रपटाने जवळपास ६८ कोटींची कमाई केली आहे. तर या चित्रपटाचं बजेट ६० ते ६५ कोटी सांगण्यात येतंय. सोबतच या चित्रपटाने संपूर्ण जगभरात ९७ कोटींची कमाई केली आहे. या चित्रपटाचे नाईट शो जोरदार सुरू आहेत. काही दिवसातच हा चित्रपट १०० कोटींच्या क्लबमध्ये दाखल होईल यात शंका नाही.