‘Pegatron’ भारतातील आयफोन निर्मिती प्रकल्प टाटा समूहाला विकणार असल्याची चर्चा; अमेरिका-चीनमधील वाढत्या तणावामुळे ‘ॲपल’ चा निर्णय

By tejpolicetimes On Apr 9, 2024

जगभरात लोकप्रिय असलेल्या आयफोनचे उत्पादन भारतात वाढत आहे. आयफोन बनवणारी ॲपलची सप्लायर पेगाट्रॉन कंपनी टाटा ग्रुपला देशातील आयफोन निर्मितीचा प्लांट विकण्याच्या तयारीत आहे. त्यासाठीची बोलणी अंतिम टप्प्यात आहेत. या करारांतर्गत, टाटा समूहाने तामिळनाडूमधील चेन्नईजवळ या प्लांटला ऑपरेट करणाऱ्या जॉईंट व्हेंचरमध्ये किमान ६५ टक्के शेअर ठेवण्याची योजना आखली आहे.

चीनबाहेरील सप्लाय चेनमध्ये व्हेरिएशन आणण्याची योजना

या प्रकरणाची माहिती असलेल्या एका सूत्राने रॉयटर्सला सांगितले की, टाटा समूह हे जॉईंट व्हेंचर त्यांच्या टाटा इलेक्ट्रॉनिक्सच्या युनिटद्वारे चालवेल. प्लांटमध्ये अंदाजे 10,000 कामगार आहेत आणि इथे दरवर्षी अंदाजे 5 दशलक्ष आयफोन तयार केले जातात. तैवानच्या पेगाट्रॉनने गेल्या वर्षी चीनमधील आपला आयफोन उत्पादन कारखाना लक्सशेअरला सुमारे 290 दशलक्ष डॉलरमध्ये विकला. अमेरिका आणि चीनमधील वाढत्या तणावामुळे ॲपलने चीनबाहेरील सप्लाय चेनमध्ये व्हेरिएशन आणण्याची योजना आखली आहे. टाटा ग्रुप आणि पेगाट्रॉन यांनी मात्र यावर अद्याप काही भाष्य केलेले नाही.

ॲपलच्या देशातील विक्री आणि उत्पादनात झपाट्याने वाढ

टाटा समूहाचा आधीच कर्नाटकात आयफोन असेंब्ली प्लांट आहे. गेल्या वर्षी हा प्लांट तैवानच्या विस्ट्रॉनकडून खरेदी करण्यात आला होता. याशिवाय टाटा समूह तामिळनाडूतील होसूर येथे आणखी एक प्लांट बांधत आहे. यामध्ये Pegatron हा त्याचा जॉईंट व्हेंचर भागीदार होऊ शकतो. Apple ने प्रॉडक्शन-लिंक्ड इन्सेंटिव्ह (PLI) योजनेत भाग घेतल्यानंतर भारतातील 1.5 लाखाहून अधिक लोकांना रोजगार उपलब्ध करून दिला आहे. गेल्या काही वर्षांत कंपनीची देशातील विक्री आणि उत्पादन झपाट्याने वाढले आहे.

ॲपलने केले भारतावर लक्ष केंद्रित

अलीकडे, सरकारी अधिकारी आणि तज्ञांच्या हवाल्याने एका मीडिया रिपोर्टमध्ये असे म्हटले आहे की पीएलआय योजनेचा लाभ घेणाऱ्या कंपन्यांद्वारे सुमारे तीन लाख इतर लोकांना अप्रत्यक्ष रोजगार मिळाला आहे. अहवालात एका अधिकाऱ्याच्या हवाल्याने म्हटले आहे की, “गेल्या 32 महिन्यांत ऍपलच्या इकोसिस्टममध्ये चार लाखांहून अधिक नोकऱ्या (प्रत्यक्ष आणि अप्रत्यक्ष) निर्माण होण्याची शक्यता आहे.” अमेरिका आणि चीनसारख्या मोठ्या बाजारपेठांमध्ये वाढती आव्हाने असूनही, ॲपलने जगातील दुसऱ्या क्रमांकाची स्मार्टफोन बाजारपेठ असलेल्या भारतावर आपले लक्ष केंद्रित केले आहे. कंपनीने 2017 मध्ये देशात आयफोनचे उत्पादन सुरू केले होते.

Source link