ओप्पोनं आणला जबरदस्त फोन; उंचावरून पडल्यावर देखील राहील सही सलामत, पाण्यात देखील नो टेन्शन

ओप्पोनं आज आपल्या ‘ए’ सीरीज अंतगर्त नवीन स्मार्टफोन OPPO A3 Pro लाँच केला आहे. हा मोबाइल चीनी बाजारात सादर करण्यात आला आहे जो 24GB RAM (12GB+12GB) आणि MediaTek Dimensity 7050 चिपसेटसह आला आहे. तसेच या ओप्पो मोबाइलमध्ये 64MP Camera, 67W Fast Charging आणि IP69 रेटिंग मिळते. त्यामुळे हा फोन वॉटर आणि डस्ट प्रूफ आहेच त्याचबरोबर यात स्क्रॅच आणि ड्रॉप प्रोटेक्शन देखील देण्यात आलं आहे. म्हणजे हा फोन उंचावरून पडल्यावर देखील सही सलामत राहील.

OPPO A3 Pro Price

ओप्पो ए३ प्रो चीनमध्ये तीन व्हेरिएंट्समध्ये लाँच झाला आहे. याच्या ८जीबी रॅम मॉडेलची किंमत १९९९ युआन म्हणजे २३,५०० रुपयांच्या आसपास आहे. तसेच फोनचा १२जीबी+२५६जीबी मॉडेल २१९९ युआन तर १२जीबी+५१२जीबी व्हेरिएंट २४९९ युआनमध्ये लाँच झाला आहे. ही किंमत अनुक्रमे २५,९९९ रुपये आणि २९,००० भारतीय रुपयांमध्ये रूपांतरित होते. चीनमध्ये मध्ये हा फोन Azure, Pink आणि Blue कलरमध्ये विकला जाईल.

OPPO A3 Pro चे स्पेसिफिकेशन्स

ओप्पो ए३ प्रो ५जी फोनमध्ये २४१२ x १०८० पिक्सल रेजोल्यूशन असलेला ६.७ इंचाचा फुलएचडी+ डिस्प्ले आहे. ही कर्व्ड स्क्रीन आहे जी ओएलइडी पॅनलवर बनली आहे तसेच १२०हर्ट्झ रिफ्रेश रेटवर चालते. फोनमध्ये इन-डिस्प्ले फिंगरप्रिंट सेन्सर मिळते.

हा ओप्पो मोबाइल अँड्रॉइड १४ आधारित कलर ओएसवर चालतो. तसेच प्रोसेसिंगसाठी यात ६नॅनोमीटर फॅब्रिकेशनवर बनलेला मीडियाटेक डायमेन्सिटी ७०५० ऑक्टाकोर प्रोसेसर देण्यात आला आहे जो २.६गीगाहर्ट्झ पर्यंतच्या क्लॉक स्पीडवर चालू शकतो. ग्राफिक्ससाठी यात माली जी६८ जीपीयू मिळतो. OPPO A3 Pro चीनमध्ये तीन मेमरी व्हेरिएंट्समध्ये लाँच झाला आहे. याच्या बेस मॉडेलमध्ये ८जीबी रॅम व २५६जीबी स्टोरेज आहे. तसेच दोन्ही व्हेरिएंट्स १२जीबी रॅमचा सपोर्ट मिळतो सोबत २५६जीबी स्टोरेज तसेच ५१२जीबी स्टोरेज देण्यात आली आहे. हा मोबाइल १२जीबी पर्यंतच्या वचुर्अल रॅमला देखील सपोर्ट करतो.

फोटोग्राफीसाठी ओप्पो ए३ प्रो मध्ये ड्युअल रियर कॅमेरा देण्यात आला आहे. याच्या बॅक पॅनलवर एफ/१.७ अपर्चर असलेला ६४ मेगापिक्सल मेन सेन्सर आहे जो २ मेगापिक्सलच्या पोर्टरेट लेन्ससह चालतो. तसेच सेल्फी व्हिडीओ कॉलिंगसाठी या फोनमध्ये एफ/२.० अपर्चर असलेला ८ मेगापिक्सल फ्रंट कॅमेरा देण्यात आला आहे. OPPO A3 Pro 5G फोनमध्ये पावर बॅकअपसाठी ५,०००एमएएचची बॅटरी देण्यात आली आहे. तसेच ही मोठी बॅटरी वेगानं चार्ज करण्यासाठी स्मार्टफोनमध्ये ६७वॉट फास्ट चार्जिंग टेक्नॉलॉजी देण्यात आली आहे जी हा फोन ४४ मिनिटांत ० ते १०० चार्ज करू शकते.