तुम्ही आशेचा किरण बनून आलात, कतारच्या कैदेतून परतलेल्या निवृत्त कॅप्टनचे मोदींना पत्र

वृत्तसंस्था, नवी दिल्ली : ‘अतिशय प्रतिकूल अशा परिस्थितीला तोंड देत असताना, तुम्ही आशेचा किरण बनून पुढे आलात. राजकारणात एका अतुलनीय मार्गदर्शक शक्तीला मूर्त रूप देण्यासाठीच तुमचा उदय झाला आहे,’ अशा शब्दांत कतारने मुक्त केलेल्या निवृत्त कॅप्टन सौरभ वशिष्ठ आणि त्यांच्या वडिलांनी पंतप्रधान नरेंद्र मोदी यांच्याबद्दल कृतज्ञता व्यक्त केली आहे. तसे पत्र त्यांनी मोदींना लिहिले असल्याची माहिती अधिकाऱ्यांनी बुधवारी दिली.

भारताच्या अथक राजनैतिक प्रयत्नांनंतर कतारने भारतीय नौदलाच्या आठ निवृत्त अधिकाऱ्यांची सुटका केली होती. पंतप्रधान मोदींसह भारताच्या परराष्ट्र मंत्रालयाचे यावेळी सर्वत्र कौतुक झाले. आपल्या सुटकेसाठी केलेल्या विशेष प्रयत्नांबद्दल वशिष्ठ यांनी मोदींचे मनःपूर्वक आभार मानले आहेत. ‘आमचे हृदय कौतुक आणि आदराने भरलेले आहे’, असे नमूद करतानाच जीवनातील आव्हानात्मक टप्प्यावर दिलेला पाठिंबा आणि सुटकेसाठी केलेल्या अथक प्रयत्नांबद्दल त्यांनी मोदींच्या नेतृत्वाचे तोंड भरून कौतुक केले असल्याचे अधिकाऱ्यांनी सांगितले.

‘विकासाच्या वाटेवर मार्गक्रमण करताना एकाही देशवासीयाला मागे न ठेवण्याचे तुमचे पवित्र व्रत आमच्या आत्म्यामध्ये खोलवर प्रतिबिंबित झाले आहे. तुम्ही आपल्या वचनबद्धतेची प्रामाणिकता वारंवार सिद्ध केलेली आहे’, अशा शब्दांत वशिष्ठ यांनी या पत्रात मोदींवर स्तृतिसुमने उधळली आहेत.

यंदा मतदानाला जाताना…; शरद पवारांनी भरसभेत मोदींची ऑडिओ क्लिप ऐकवली अन् मग…
‘पंतप्रधान मोदींना विशेष अतिथी म्हणून अमेरिकेकडून आलेले बोलावणे, फ्रान्सच्या बॅस्टिल डे परेडला प्रमुख पाहुणे म्हणून त्यांनी लावेलली हजेरी आणि जी-२० शिखर परिषदेचे भूषवलेले यजमानपद यांसारखी त्यांची यशस्वी राजनैतिक घोडदौड पाहता आमच्या सुटकेसाठी ते सर्वतोपरी प्रयत्न करतील, याची कतारच्या तुरुंगात खात्री वाटत होती’, असेही त्यांनी या पत्रात म्हटले आहे.

वशिष्ठ यांच्यासह या आठ निवृत्त भारतीय अधिकाऱ्यांना हेरगिरीच्या आरोपाखाली कतारने फाशीची शिक्षा सुनावली होती. मात्र, भारताच्या यशस्वी शिष्टाचारानंतर फेब्रुवारीमध्ये त्यांची सुटका करण्यात आली व ते मायदेशी परतले.