5 वर्षांच्या मुलाच्या हातात फुटला स्मार्टफोन, तुम्ही देखील मोबाईल वापरतांना या चुका करत असाल तर सावधान!

उन्हाळ्यात स्मार्टफोन गरम होणे ही एक सामान्य गोष्ट आहे. पण त्याचा एखाद्या बॉम्बसारखा स्फोट होणे ही आश्चर्याची बाब आहे. आज आम्ही तुम्हाला ओडिशातील कटकमध्ये नुकतीच घडलेल्या अशाच एका घटनेबद्दल सांगणार आहोत. येथे सकाळी 9 च्या सुमारास एका 5 वर्षाच्या मुलाचा स्मार्टफोन स्फोट झाला आणि त्याला तातडीने रुग्णालयात दाखल करण्यात आले. असे कशामुळे घडते व यासोबतच तुम्ही अशा प्रकारच्या घटनांपासून कसे दूर राहाल हे सांगणार आहोत ज्याच्या मदतीने तुम्ही या चुका टाळून सुरक्षित राहू शकता.

उन्हात फोन चार्जिंगला ठेवणे

चार्जिंग करताना, तुम्ही स्मार्टफोनच्या टेंप्रेचरची अत्यंत काळजी घेतली पाहिजे. कारण जेव्हा जेव्हा स्मार्टफोन चार्ज होतो तेव्हा त्याचे टेंप्रेचर वाढते. याशिवाय फोन उन्हात चार्जिंगला ठेवल्यास टेंप्रेचर आणखी वाढू शकते. यामुळेच ॲपलने आता आयफोनमध्ये चार्जिंग होल्डचा पर्याय उपलब्ध करून दिला आहे. म्हणजेच फोनचे टेंप्रेचर जास्त असताना सिस्टिम चार्जिंग थांबवते.

जास्त वेळ गेम खेळणे

गेमिंग करतानाही तुम्हाला खूप सावध राहावे लागेल. कारण यामुळे फोनचे टेंप्रेचरही सतत वाढते. त्यामुळे टेंप्रेचर कंट्रोलमध्ये ठेवण्यासाठी काही काळ विश्रांती घ्यावी. यामुळे मदरबोर्डपासून स्मार्टफोनपर्यंतचे इतर पार्ट्स थंड होतात.

पाण्यापासून ठेवा दूर

स्मार्टफोनला पाण्यापासून दूर ठेवण्याचा प्रयत्न केला पाहिजे. फोन पाण्याजवळ राहिला तरी तो खराब होऊ शकतो. तसेच, अनेकदा असे दिसून आले आहे की लोक वॉटरप्रूफ फोन पाण्यातून बाहेर येताच चार्जिंगला लावतात, जे स्मार्टफोनच्या लाइफसाठी खूप धोकादायक ठरू शकते. स्मार्टफोन खरेदी करण्यासोबतच सुरक्षितपणे त्याचा वापर करण्याकडे देखील आपण लक्ष दिले पाहिजे.

वापरादरम्यान मोबाईलचे टेंप्रेचर वाढू लागल्यास काळजी घ्या. अशा वेळी कोणताही अपघात होऊ नये म्हणून फोन बंद ठेवा. याशिवाय चार्जिंगला असतांना फोनवर बोलू नका. वीज पुरवठ्यात अडचण आल्यावर किंवा डिवाइस जास्त गरम झाल्यावरच मोबाइल फोनला आग लागते. फोन रात्रभर चार्जिंगला ठेवू नका. लोकल चार्जिंग वायरने फोन चार्ज करणे टाळा.