Kalki 2898 AD ची बॉक्स ऑफिसवर दणक्यात एन्ट्री; पहिल्याच दिवशी जाळ अन् धूर संगट!

मुंबई: ‘कल्की २८९८ एडी’ हा सिनेमा २७ जून रोजी प्रदर्शित झाला. सिनेमाने पहिल्या दिवशी अपेक्षेप्रमाणे चांगली कामगिरी केली आहे. प्रभास, दीपिका पादुकोण, अमिताभ बच्चन, कमल हासन तसंच दिशा पाटनी अशी कलाकारांची मोठी फौज असलेला सिनेमा पहिल्या दिवशी किती कमाई करेल, याची उत्सुकता सर्वांना होती. सुरुवातीच्या आकडेवारीनुसार, Kalki 2898 AD ने चांगली कमाई केली आहे.

भारतात पहिल्याच दिवशी १०० कोटी क्लबमध्ये एन्ट्री

‘कल्की २८९८ एडी’ या सिनेमाने भारतात पहिल्याच दिवशी १०० कोटींचा टप्पा गाठला आहे. सर्व भाषांमध्ये सिनेमाने एवढी कमाई केली आहे. भारतातील नेट बॉक्स ऑफिस १०० कोटी असून, ग्रॉस बॉक्स ऑफिस कलेक्शन १२० कोटी इतके झाले आहे. Sacnilk ने याविषयी रिपोर्ट दिला आहे.

जगभरात गल्ला २०० कोटींच्या जवळपास

Sacnilk च्या आकडेवारीनुसार, जगभरात ‘कल्की २८९८ एडी’चे कलेक्शन १९० कोटी रुपयांवर पोहोचले आहे. अर्थात रिपोर्टमध्ये देण्यात आलेली ही सुरुवातीची आकडेवारी आहे, त्यामुळे पूर्ण आकडेवारी समोर आल्यानंतर त्यामध्ये वाढ होऊ शकते. सिनेमाची सर्वाधिक कमाई तेलुगू भाषेमधून झाल्याचे समोर आले आहे.

पहिल्याच दिवशी ‘कल्की २८९८ एडी’ची कमाई पाहता २०२४ मधील हा सर्वाधिक कमाई करणारा सिनेमा ठरू शकतो. दरम्यान या सिनेमाच्या एन्ट्रीनंतर ‘मुंज्या’ने बॉक्स ऑफिसवर घातलेला धुमाकुळ काहीसा थांबलेला पाहायला मिळाला. २५ ते ३० कोटी बजेट असणाऱ्या ‘मुंज्या’ या सिनेमानेही १०० कोटींचा टप्पा गाठला आहे. दुसरीकडे ‘चंदू चॅम्पियन’ आणि ‘इश्क विश्क रिबाउंड’ या सिनेमांनी अपेक्षित कमाई झाली नाही.

‘कल्की २८९८ एडी’बद्दल सांगायचे झाल्यास सिनेमाचे दिग्दर्शन नाग अश्विन याने केले असून वैजयंती मुव्हीजने निर्मिती केली आहे. घोषणा झाल्यापासूनच प्रेक्षाकांना सिनेमाबद्दल उत्सुकता होती. त्यातच हा सिनेमा गुरुवारी प्रदर्शित झाल्याने गुरुवार, शुक्रवार, शनिवार आणि रविवार असे चार दिवस पहिल्या वीकेंडपर्यंत मिळतील. परिणामी पहिल्याच वीकेंडपर्यंत प्रभास-दीपिकाचा हा चित्रपट रेकॉर्ड ब्रेकिंग कमाई करू शकतो.