Vi tariff hike: युजर्स लक्ष द्या! उद्यापासून वाढणार सर्व प्लॅन्सच्या किंमती, आज रिचार्ज केल्यास होईल 600 रुपयांपर्यंतची बचत

Vi Plans New Prices: टेलिकॉम कंपन्यांनी मोबाइल रिचार्जचे दर वाढवले आहेत. आज 3 जुलैपासून जिओ (Jio) आणि एअरटेल (Airtel) चे सर्व प्रीपेड-पोस्टपेड मोबाइल रिचार्जचे दर वाढले आहेत. परंतु जर तुम्ही वोडा-आयडिया (Vi) चे सिम वापरत असाल, तर आजचा दिवस तुमच्याकडे आहे. Vi नेही आपल्या रिचार्ज प्लान्समध्ये वाढ केली आहे, परंतु वाढलेल्या किमती उद्या म्हणजे 4 जुलैपासून लागू होतील. जर तुम्ही Vi ग्राहक असाल आणि रिचार्जची तारीख जवळ येत असेल तर तुमचा नंबर आजच रिचार्ज करून घ्या. यामुळे तुम्ही 600 रुपयांपर्यंतची बचत करू शकता.

वोडा-आयडियाचे सर्व प्लॅन्स उद्यापासून महाग होतील. कंपनी एकूण 13 टेरिफ रिवाइज करणार आहे. यामध्ये सर्वात स्वस्त टेरिफ जो 19 रुपयांचा होता, तो आता 22 रुपयांचा होणार आहे. हा एक डेटा ऍड ऑन प्लॅन आहे आणि एक दिवसासाठी 1 जीबी डेटा ऑफर करतो. तसेच, सर्वात महाग प्रीपेड रिचार्ज जो 2899 रुपयांचा होता, तो आता 3599 रुपयांचा होणार आहे.

Vi नवीन रिचार्ज प्लॅन्स

Viने 13 रिचार्ज प्लान्सना रिवाइज केले आहे, त्यामध्ये सर्वात स्वस्त 28 दिवसांची व्हॅलिडिटी असलेला रिचार्ज आता 199 रुपयांचा होणार आहे. याआधी त्याची किंमत 179 रुपये होती. तसेच, 269 रुपयांचा प्लान आता 299 रुपयांचा होईल. 299 रुपयांच्या 28 दिवसांच्या रिचार्जसाठी 349 रुपये द्यावे लागतील. तसेच, 56 दिवसांचा सर्वात स्वस्त प्लॅन जो 329 रुपयांचा होता, तो आता 369 रुपयांचा होणार आहे. 479 रुपयांचा प्रीपेड रिचार्ज आता 579 रुपयांमध्ये होणार आहे. 539 रुपयांच्या प्लॅनसाठी तुम्हाला 649 रुपये द्यावे लागतील.

84 दिवसांचा प्रीपेड रिचार्ज जो 459 रुपयांचा आहे, तो उद्यापासून 509 रुपयांचा होणार आहे. 719 रुपयांच्या प्लॅनसाठी 859 रुपये द्यावे लागतील. 84 दिवसांचा सर्वात महाग जो प्रीपेड रिचार्ज 839 रुपयांचा आहे, तो आता 979 रुपयांमध्ये येणार आहे. कंपनीने 180 दिवसांची व्हॅलिडिटी असलेला रिचार्ज आणला आहे. हा 1449 रुपयांचा आहे, परंतु उद्यापासून त्याची किंमत 1749 रुपये होणार आहे. 365 दिवसांचा रिचार्ज प्लॅन सुमारे 600 रुपये महाग झाला आहेत 2899 रुपयांच्या रिचार्जसाठी उद्यापासून 3499 रुपये मोजावे लागतील.