नेपाळ दुहेरी बस दुर्घटना; ६५ प्रवाशांसह दोन बस नदीत कोसळल्या, एका भारतीय प्रवाशाचा मृतदेह सापडला

काठमांडू : दोन दिवसांपूर्वी नेपाळमध्ये भूस्खलनामुळे दोन बस नदीत वाहून गेल्याची घटना घडली. भूस्खलन झाल्यामुळे दोन बस नदीच्या प्रवाहात वाहून गेल्या. या बसमध्ये किमान ६५ प्रवासी होते. चितवन जिल्ह्यातील सिमतलाल भागात असलेल्या नारायणघाट-मुगलिंग मार्गावर भूस्खलन झालं. त्यानंतर या बस त्रिशूली नदीत वाहून गेल्या. मुसळधार पावसामुळे त्रिशूल नदीतील पाणी पातळी वाढली आहे. प्रवाहाचा वेग वाढलेला आहे.या अपघातात ६५ प्रवाशांपैकी काही भारतीय प्रवाशांचा देखील समावेश आहे. सापडलेल्या मृतदेहांपैकी एका भारतीय प्रवाशाचा मृतदेह देखील सापडला आहे. ऋषी पाल शाही असे मृताचे नाव आहे. मात्र, त्यातील तीनजण पोहून सुरक्षितस्थळी पोहोचले आहेत. सकाळी सापडलेला पहिला मृतदेह अपघातस्थळापासून ५० किमी अंतरावर आढळून आला. चितवन जिल्ह्यातील नारायणी नदीत भारतीय व्यक्तीचा मृतदेह अर्धा वाळूने झाकलेला आढळून आला, असंही पोलिसांनी सांगितलं.
Shooting on Donald Trump : डोनाल्ड ट्रम्प यांच्या रॅलीत गोळीबार, माजी राष्ट्राध्यक्ष थोडक्यात वाचले, अमेरिकेत खळबळ

घटनास्थळी दुपारी बचावकर्त्यांनी पूर्व नवलपरासी जिल्ह्यातील गैंडाकोट परिसरातून दोन अतिरिक्त मृतदेह बाहेर काढले. अपघातात बेपत्ता झालेले दोघेही मृत नेपाळी नागरिक असल्याचं पोलिसांनी सांगितलं. ते प्रवासी बीरगंज ते काठमांडूला जाणाऱ्या बसमधील प्रवासी होते. बेपत्ता झालेल्या भारतीय नागरिकांमध्ये ऋषी पाल शाही शिवाय संतोष ठाकूर, सुरेंद्र साह, आदित मियाँ, सुनील, शाहनवाज आलम आणि अन्सारी यांचा समावेश आहे.

भारतीय नागरिकांसह २४ जणांना घेऊन जाणारी एक बस, बीरगंज ते काठमांडू आणि दुसरी ३० स्थानिक प्रवाशांसह काठमांडूहून गौरला जाणारी बस, मुसळधार पावसामुळे झालेल्या भूस्खलनात वाहून गेली. पोलीस उपअधीक्षक (डीएसपी) आणि चितवन जिल्हा पोलीस कार्यालयाचे प्रवक्ते भेष राज रिजाल यांनी दिलेल्या माहितीनुसार, मृत भारतीय नागरिक काठमांडूहून गौर येथे जात असलेल्या बसमधील प्रवासी होते, असे मायरेपब्लिका न्यूज पोर्टलने वृत्त दिले आहे.

ऋषी पाल शाही हा मूळचा बिहारच्या मोतिहारी शहरातील राजमुनुवा भागातील असून तो नेपाळमध्ये राहतो आणि तिथे काम करत असे. शोध मोहिमेसाठी नेपाळी लष्कर आणि नेपाळ पोलिसांचे ५०० हून अधिक सुरक्षा कर्मचारी तैनात करण्यात आले आहे. मायरेपब्लिकाने दिलेल्या वृत्तानुसार, ऑपरेशन दरम्यान त्रिशूली नदीत हरवलेल्या बसेस शोधण्यासाठी सशस्त्र पोलीस दल (APF) च्या वॉटर ड्रोनसह मोटरबोट्स आणि ड्रोनचा वापर करण्यात आला.